O Goberno galego traslada as súas condolencias aos familiares dos falecidos no accidente aéreo dos Alpes
O presidente da Xunta transmite, en nome de todos os galegos, as condolencias aos familiares e amigos dos falecidos hoxe no accidente do avión da compañía Germanwings nos Alpes, que cubría a ruta entre Barcelona e Düsseldorf
“Galicia e os galegos sentímonos moi solidarios co pobo francés pero, moi especialmente, coas familias dos españois que perderon a vida” no sinistro,
A Estrada (Pontevedra).- A Xunta de Galicia, a través do presidente do Goberno autonómico, trasladou hoxe en nome de todos os galegos as súas condolencias aos familiares e amigos dos falecidos hoxe no accidente do avión da compañía Germanwings nos Alpes que cubría a ruta entre Barcelona e Düsseldorf.
Durante un acto na Estrada, Alberto Núñez Feijóo, tivo tamén palabras de recoñecemento para o labor de todos os profesionais que están a traballar na recuperación dos corpos. “A todos eles, que durante as próximas horas e días terán moito traballo, un recoñecemento moi especial ao seu labor”, aseverou.
Logo de facer referencia ao tráxico accidente de Angrois, Feijóo afirmou que “Galicia e os galegos sentímonos moi solidarios co pobo francés pero, moi especialmente, coas familias dos españois que perderon a vida”.
Feijóo concluíu expresando o desexo de que as próximas novas aclaren cales foron as causas do accidente aéreo.
Escribe tu comentario