Os deputados do BNG amordázanse para evidenciar o silenciamento
Tanto Jorquera como os seus compañeiros de grupo permaneceron no hemiciclo nas súas filas e observaron a sesión de control con cintas adhesivas na boca simulando unha mordaza.
Os deputados do BNG asistiron este mércores á sesión de control ao presidente galego, Alberto Núñez Feijóo, amordazados con cintas adhesivas na boca para evidenciar o que interpretan como un “silenciamento” debido á activación da nova repartición de iniciativas na Cámara autonómica, que propicia que o Grupo Mixto poida interpelar ao mandatario autonómico.
Neste caso, a pregunta que rexistrara o BNG para preguntarlle cinguíase ao feito de que os populares galegos presenten ás próximas eleccións municipais de maio a “numerosos candidatos imputados”.
Debido á nova cota, o portavoz parlamentario do BNG, Francisco Jorquera, non puido preguntar a Feijóo, quen pola súa banda afirmou a semana pasada que botaría de menos as súas preguntas por ser as habitualmente “máis respectuosas” e subliñou que, no que a el respecta, seguirá contestando “ao mesmo número” de cuestións formuladas pola oposición.
Tanto Jorquera como os seus compañeiros de grupo permaneceron no hemiciclo nas súas filas e observaron a sesión de control con cintas adhesivas na boca simulando unha mordaza. Ademais, colgaron ante as súas mesas carteis de denuncia sobre a situación de Povisa baixo a lema: ‘Despedidos readmisión. Povisa culpable. Sergas responsable’.
Escribe tu comentario