Manuel Guede renuncia como director do Centro Dramático Galego

O dramaturgo Manuel Guede Oliva presentou a súa renuncia como director do Centro Dramático Galego (CDG), unha decisión que se produciu "a petición propia" e "por motivos persoais", segundo informa a Consellería de Cultura.

Así, o Consello Reitor da Axencia Galega das Industrias Culturais (Agadic) decidiu na súa reunión deste mércores aceptar a renuncia de Guede Oliva e expresou o seu "agradecemento" aos servizos prestados por o ata agora director do CDG.

Por outra banda, o Consello Reitor autorizou a posta en marcha de forma inmediata dun procedemento público de selección de persoal para cubrir a praza de coordinador do departamento de Produción Teatral da Agadic, posto que ocupaba Manuel Guede e que comprende entre as súas funcións a dirección da compañía institucional galega.

Manuel Guede chegou á dirección do CDG en substitución de Branca Cendán tras a súa destitución en setembro de 2012, un posto que o dramaturgo xa ocupara entre 1991 e 2005. Durante a súa estanza á fronte da compañía pública, Guede fixo do fomento das relacións e o intercambio con Portugal o seu principal selo.