​O Arde Lucus amplíase no seu 15 aniversario

O Arde Lucus amplíase no seu décimo quinto aniversario, chegando ata catro días de festa de recreación histórica con máis de 400 actividades entre o 16 e o 19 de xuño.

A festa foi presentada este venres pola alcaldesa de Lugo, acompañada de distintas asociacións participantes cuxos componentes acudiron caracterizados como romanos e castrexos para ir abrindo boca.

Foi Lara Méndez a encargada de recoñecer que o aniversario deste ano "merecía dedicarlle un día máis para conmemorar" o pasado romano de Lugo, arrincando as actividades o xoves 16 de xuño ás seis da tarde, cun "desfile de tropas romanas" e "tribos" castrexas pola rolda da muralla.

Ademais, explicou que se traballa para "conseguir que sexa festa de Interese Turístico Nacional" para poñer en "maior valor" esta festividade sobre a recreación histórica da cidade de Lugo. Non pasou por alto a importancia económica, cun volume de negocio, o pasado ano, que pasou os seis millóns de euros e os seiscentos mil visitantes.

Pero o importante serán as 400 actividades que se celebrará en Lugo durante estes días , nun completo programa que pode consultarse aquí.