​Moción de censura en Mugardos

No centro, Pilar Díaz. //@Esqueda Unida Mugardos Facebook

Tres dos grupos da oposición do Concello de Mugardos --Esquerda Unida, Iniciativa Cidadá de Mugardos e o BNG-- rexistraron a moción para desaloxar da alcaldía o PP, que goberna en minoría. Deciden desbancar o alcalde do PP por considerar que as súas ideas de goberno son coincidentes. Suman 8 concelleiros (3 de EU, 3 de Iniciativa e 2 BNG), fronte os 4 do PP. O PSOE ten un edil.

Pilar Díaz, de EU, que será previsiblemente a próxima alcaldesa manifestou que a coincidencia dos programas dos tres partidos se tiña que converter en "execución". En declaracións á Radio Galega, criticou que "non é baladí que durante todos estes meses levasemos múltiples mocións ao pleno e que ningunha fose executada por parte do Goberno. Polo tanto, agora había unha disfunción entre a maioría do pleno, a maioría cidadá e o goberno que nos estaba a gobernar".

O alcalde do PP, Juan Domingo de Deus, declara que marcha "co orgullo do traballo ben feito" e despois de detectar irregularidades nas contas dos gobernos anteriores. Salienta 18 millóns sen xustificar. "Despois de 18 anos de esquerda a xente quería saber a onde podiamos chegar. Só nos deixaron un ano porque supoño que se nos deixasen os 4 isto non tería volta atrás", defendeu.

Será no pleno extraordinario do próximo 12 de agosto cando a alcaldía previsiblemente pasará a mans de Pilar Díaz Otero, de Esquerda Unida.