Este verán só choveu pouco máis da metade do normal nesta época

Galicia rexistrou precipitacións "un 42 por cento por baixo do normal" durante este verán. Así o asegura Meteogalicia no seu avance climatolóxico, no que tamén apunta que o estío de 2016 foi "moi cálido e seco", alcanzando "un grao centígrado de diferenza coa media climática".

O informe sinala que a temperatura media de Galicia durante o verán foi de 18 graos. As zonas de alta montaña de Ourense --Cabeza de Manzaneda e a serra de Ou Xistral-- foron as áreas que rexistraron as medias máis baixas.

Por contra, nas localidades do Miño ourensán, o canón do Sil e O Condado as temperaturas medias foron as máis altas, superando os 22 graos centígrados. Deste xeito, o verán de 2016 foi un dos máis cálidos desde que se teñen rexistros, seguido polos dos anos 2013 e 2015.

En canto ás precipitacións, este verán choveu "un 42 por cento menos do normal", similar aos rexistros de 1998, 2005 e 2013. De feito, en varias localidades galegas non se produciron chuvascos no mes de xullo.

MÁXIMA HISTÓRICA EN SANTIAGO

A temperatura máxima alcanzada en Santiago de Compostela o pasado martes 6 de setembro, 38,7 graos, foi unha das máis altas dos últimos 35 anos.

Así, o valor alcanzado o martes foi o terceiro máis alto desde que existen medicións, por detrás dos 40,3 do 20 de xullo de 1990 e os 39,7 do 12 de agosto de 2003.