​A infanta chega a Río para animar no treito final aos deportistas paralímpicos

A Infanta Elena, vicepresidenta de honra do Comité Paralímpico Español, aterrou onte á noite en Río de Janeiro para presenciar as probas e animar aos deportistas españois nos Xogos Paralímpicos que se disputan na cidade brasileira ata o vindeiro domingo día 19.

A partir deste mércores, a infanta acudirá ás competicións con presenza destacada de representantes españois, como o partido de cuartos de final de baloncesto en cadeira de rodas entre España e Alemaña esta tarde, ou probas de natación e ciclismo en ruta, todo iso na zona de Barra.

O xoves 15 está prevista unha visita á Vila Paralímpica e un encontro con deportistas e membros da delegación española, con quen compartirá xantar no comedor da Vila. Tamén asistirán a esta visita un grupo de representantes das empresas patrocinadoras do Equipo Paralímpico Español.

XORNADA SEN METAIS

Onte completouse o sexto día de competición en Río 2016, que rematou sen ningún metal para os paralímpicos español, pero que deixou sete diplomas polo que o equipo acumula xa 12 medallas e 44 diplomas. 

No Estadio Olímpico Joao Havelange, Sara Martínez quedou a só un centímetro do bronce e a catro da prata no salto de lonxitude (F12, deportistas con discapacidade visual).

Martínez comezou o concurso na segunda posición despois de saltar 5,38 metros no primeiro intento, por 6,09 de Zubkovska e 5,44 de Hamri. Despois fixo un nulo e o terceiro salto voou ata os 5,52 metros, co que se situou a un centímetro da alxerina.

Con 5,34 metros no cuarto salto e 5,31 no quinto, Martínez afrontaba o último intento sabedora de que poucos minutos antes a acerbaixana Elena Chebanu apeábaa momentaneamente do podio ao chegar ata 5,56 metros e empolicarse ata a segunda praza, para o que bateu a súa propia plusmarca persoal en 44 centímetros.

A madrileña quedou en 5,46 na última tentativa, co que tivo que conformarse co cuarto posto, a un centímetro do bronce logrado por Hamri e catro centímetros da prata de Chebanu. O ouro foi para Zubkovska (6,11). Nese mesmo concurso, a española Sara Fernández finalizou oitava, con 4,47 metros como mellor marca no seu cuarto salto.

Outros dos finalistas que quedaron moi preto das súas medallas foron Sarai Gascón, que rematou quinta nos 50 metros libre (S9) ou José Antonio Marí, tamén quinto na mesma proba e categoría. 

Tamén en natación Miguel Ángel Martínez Tajuelo rematou sexto, ao igual ca en Pekín 2008 nos 50 libre (S3), Judit Rolo foi sétima nos 200 estilos (SM7) e Nuria Marqués, que foi oitava na mesma categoría ca Gascón.

De entre os galegos, José Manuel Prado estreouse na categoría individual de BC1 (é o 20º do mundo) con derrota contra o grego Panagiotis Soulanis (5º) por 1-6. Ao ourensán quédanlle aínda por disputar dous partidos da fase de grupos.