​Cae a confianza dos consumidores

A confianza do consumidor retrocedeu 6,3 puntos o pasado mes de setembro en relación ao mes anterior, ata situarse en 91 puntos, o seu menor nivel desde maio, debido ao descenso tanto das expectativas como da valoración que fan os cidadáns da situación actual.

O descenso da confianza dos consumidores rexistrado en setembro contrasta co repunte de 2,5 puntos experimentado en agosto, segundo os datos publicados este luns polo Centro de Investigacións Sociolóxicas (CIS).

En setembro, o indicador de situación actual baixou 6,3 puntos en relación ao mes anterior, ata os 83,8 puntos, cun comportamento negativo dos seus tres compoñentes (evolución xeral da economía, emprego e situación dos fogares).

En concreto, a valoración sobre a situación actual da economía esborrallouse 8,8 puntos en relación ao mes anterior, mentres que a relativa ao mercado de traballo diminuíu 6,6 puntos. Algo máis moderado foi o retroceso na valoración sobre a situación actual dos fogares (-3,4 puntos), mostrándose, segundo o CIS, como o compoñente máis estable.

O indicador de expectativas tamén retrocedeu 6,3 puntos en setembro respecto ao mes anterior, ata situarse en 98,1 puntos, o seu nivel máis baixo desde abril. Os seus tres compoñentes experimentaron descensos, especialmente as expectativas relativas ao mercado de traballo, que caeron 7,6 puntos. Pola súa banda, as expectativas sobre a situación económica e sobre os fogares baixaron 5,8 e 5,6 puntos, respectivamente.

En relación ao mes de setembro de 2015, a evolución segue sendo negativa, xa que o descenso da confianza do consumidor alcanza os 15,1 puntos como consecuencia da caída das expectativas en 16,8 puntos e do retroceso en 13,4 puntos do indicador sobre situación actual.

O ICC recolle mensualmente a valoración da evolución recente e as expectativas dos consumidores españois relacionadas coa economía familiar e o emprego, co obxectivo de anticipar as súas decisións de consumo. O indicador recolle valores de entre 0 e 200, considerándose que por encima de 100 a percepción é positiva e por baixo, negativa.

O 44% DOS ENQUISADOS CHEGA XUSTO A FIN DE MES

En xeral, o 43% dos enquisados entende que a situación económica actual é peor que a de fai seis meses, mentres que o 34,6% non aprecia cambios e o 20,7% estima que mellorou.

Para o próximos seis meses, o 32,1% dos entrevistados confía en que o estado da economía será mellor, fronte ao 37,5% que auguran un empeoramento e o 25,1% que non espera cambios.

O ICC de setembro mostra que o 44% dos entrevistados chega xusto a fin de mes e que o 32,4% aforra pouco diñeiro cada mes. De feito, o 12,6% afirma que tivo que botar man dos seus aforros para chegar a fin de mes. Pola contra, só o 3,7% di que aforra bastante cada mes.

O 11,8% dos entrevistados afirma que agora hai máis persoas en paro na súa contorna que fai seis meses, e o 37,9% pensa que a situación en España para atopar un emprego é peor que a de fai seis meses, mentres que o 37,9% cre que a situación non cambiou e o 20,9% que mellorou.

Cando se lles pregunta pola evolución do emprego para o próximos seis meses, un 38,9% dos enquisados pensa que a situación empeorará, fronte ao 34% que cre que mellorará e o 20,7% que considera que permanecerá sen cambios.

Preguntados por se teñen en mente comprar unha vivenda o próximo ano, o 94,8% das persoas entrevistadas asegura que non e só o 4,8% planea adquirir unha. O 39,1% dos enquisados opina que o prezo da vivenda manterase o próximo ano, mentres que o 9% cre que baixará e o 47,4% que subirá.