Impulso ás comunicacións ferroviarias na eurorrexión Galicia-Norte de Portugal

|

CEP


O Eixo Atlántico e a Confederación de Empresarios de Pontevedra (CEP) presentou este venres unha iniciativa para crear un grupo de traballo "aberto", no que convidará a participar a organizacións empresariais, sindicais e administracións, para impulsar as comunicacións ferroviarias na eurorrexión Galicia-Norte de Portugal.


Segundo explicou o presidente da CEP, Jorge Cebreiros, a dinamización das infraestruturas ferroviarias é algo "prioritario" para o desenvolvemento económico e social da eurorrexión, e sinalou que, para alcanzar ese obxectivo, iniciarase unha rolda de contactos co fin de constituír esa mesa de traballo.


Nesa liña de actuación, a patronal pontevedresa reclamará a convocatoria do Consello Económico e Social da cidade para que os distintos axentes implicados "intercambien puntos de vista".


En todo caso, recalcou que a CEP considera algunhas cuestións prioritarias no ámbito das comunicacións por tren: o AVE á Meseta por Cerdedo, o saída sur de Vigo e a modernización da liña do Porriño, e a conexión por tren da Plisan e os polígonos industriais da área.


"BURACO DE 30 QUILÓMETROS"


Pola súa banda, o secretario xeral do Eixo Atlántico, Xoán Vázquez Mao, sinalou que o desenvolvemento dunha área de 7 millóns de habitantes, como é a eurorrexión, está condicionado fortemente polas comunicacións ferroviarias e, nese sentido, lamentou que existe un "buraco de 30 quilómetros" na liña férrea entre Vigo e a fronteira portuguesa.


Así, mentres o goberno luso xa proxectou e orzou a modernización da liña ata Valença, falta que España faga o propio con eses 30 quilómetros, para poder así completar todo o Eixo Atlántico, desde Ferrol ao Porto.


Ademais, Vázquez Mao advertiu de que non se trata só de dar servizo aos viaxeiros, senón tamén de facilitar a mobilidade das mercadorías, para que a eurorrexión poida ser competitiva fronte aos eixos de comunicación do Mediterráneo.


Segundo estimou, a modernización deses 30 quilómetros de vía requiriría un investimento de 450 millóns de euros, tal e como avanzan algúns estudos xa existentes. "Rescatar as caixas custou 6.000 millóns, e isto sería un 7 por cento desa cantidade, e serviría para impulsar o desenvolvemento económico e a creación de emprego", apostilou.


Por outra banda, indicou que o Tren Celta, que actualmente une Vigo e O Porto, podería manterse como un 'metro tren', é dicir, unha liña de proximidade para dar servizo á área metropolitana.


O secretario xeral do Eixo Atlántico aplaudiu a idea de crear unha mesa de traballo para loitar por eses obxectivos, porque "se se defende isto cunha única voz, haberá un peso político fronte ao Goberno".


relacionada El presidente de Portugal recibe a los representantes del Eixo Atlántico
relacionada A mostra da XI Bienal de Pintura Eixo Atlántico chega a Verín (Ourense)

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Condiciones de uso Consejo editorial
Powered by Bigpress