PPdeG e PSdeG descólganse da reunión sobre o traspaso da AP-9

O portavoz parlamentario do PSdeG, Xoaquín Fernández Leiceaga, non acudirá finalmente á reunión que impulsou o BNG para facer unha fronte común na Cámara galega co fin de reclamar a titularidade da AP-9 para Galicia. O PPdeG, a cuxo presidente, Alberto Núñez Feijóo, foi remitida a carta --segundo a información remitida aos medios polos nacionalistas no seu día-- tampouco acudirá.

O encontro, no que se abordará a reclamación que fixo o Parlamento de Galicia unanimemente na lexislatura pasada para pedir a transferencia da AP-9, queda reducido aos portavoces parlamentarios de BNG, Ana Pontón, e En Marea, Luís Villares.

Leiceaga defendeu este luns que sexa a Mesa do Parlamento a que se poña en contacto co órgano reitor do Congreso dos Deputados para que lle traslade a importancia de que esta cuestión sexa sometida a debate.

En concreto, a Cámara baixa decidiu paralizar a tramitación da proposición de lei --aprobada por unanimidade do Parlamento para que o Goberno transfira a citada autoestrada a Galicia-- baseándose en informes do Executivo que indican que esta decisión supoñería un gasto que desequilibraría os actuais orzamentos.

EVITAR DIALÉCTICA "OPOSICIÓN-GOBERNO"

Explicado isto, Leiceaga sostivo que o obxectivo da súa petición persegue "buscar posicións unánimes" no relativo á transferencia da autoestrada e traballar na procura de vías que permitan "sentirse cómodos" a todos os grupos.

De feito, tras as críticas da súa homóloga no BNG, Ana Pontón, a que o PPdeG non confirmase se acudirá á reunión fixada para o martes ás 10,00 horas (antes de confirmar que efectivamente non asistiría), insistiu na importancia de evitar a dialéctica "oposición-goberno". De feito, xulgou que "non sería unha boa noticia" que algunha formación "se descolgase" do acordo en torno ao traspaso da AP-9, como así foi finalmente tanto co equipo de goberno coma cos socialistas.