A lagoa de Massó, en Cangas, necesita protección "urxente"

A lagoa de Massó, a carón da Praia do Medio. //Foto: turismo.gal

A asociación ecoloxista Arco Iris reclamou de novo ao Concello de Cangas (Pontevedra) a protección "urxente" da lagoa de Massó, que se atopa nunha situación de "indefensión intolerable".

Membros da asociación mantiveron unha conversación coa concelleira de medio ambiente de Cangas, Tania Castro, para insistir na conveniencia de "tramitar canto antes" a petición de Espazo natural de protección municipal.

O Concello de Cangas aprobou o pasado ano iniciar a petición para que a Consellería de Medio Ambiente aprobase incluír esta zona como espazo natural de interese local. Con todo, a propia concelleira admitiu que, "por falta de medios materiais e humanos", aínda non está listo o documento que será enviado á Xunta.

"Por outra banda, hai que lembrar as recentes desavinzas no seo do goberno municipal de Cangas, que orixinou actuacións contrapostas na contorna da Lagoa de Massó, como unha roza que foi paralizado e logo autorizado de novo", lembra Arco Iris.

A asociación considera, segundo unha interpretación literal da Lei 9/2001, "que non é necesario que o concello presente un plan de conservación", xa que a Xunta pode declarar como protexido de forma provisional un espazo por un prazo de dous anos.

Por iso, Arco Iris insta o Concello de Cangas a solicitar "canto antes" unha declaración provisional de protección para a Lagoa de Massó e a súa contorna de Punta Balea. Así mesmo, "deben axilizarse de forma urxente os trámites para completar a documentación do plan de protección deste magnífico espazo natural, único na zona pola súa enorme riqueza faunística e botánica".