​A Xunta arrasa cunha poboación dun fento en perigo de extinción ao abrir unha pista

// Natureza Dixital

A Asociación para a Defensa Ecolóxica de Galicia (ADEGA) vén de denunciar que unha pista promovida por Medio Rural na lagoa de Alcaián (Coristanco) levou por diante unha poboación de Lycopodiella inundata, fento endémico considerado en perigo de extinción, segundo apuntan os ecoloxistas.

ADEGA apunta ademais a que as obras de arranxo de pistas e novos cortalumes que Medio Rural está a executar na contorna da lagoa de Alcaián "danaron tamén exemplares de Euphorbia uliginosa e Centaurea ultreiae, ambas en perigo de extinción e esta ultima endémica, así como de Spiranthes aestivalis, considerada vulnerable".

No caso da poboación da Lycopodiella arrasada, indican, os exemplares ficaban "á beira dunha charca sobre a que abriron unha nova pista, en troques de arranxar o vello camiño que alguén ocupou cunha plantación de eucaliptos".

Ademais, desde ADEGA apuntan á singularidade e riqueza desta zona denominada como a 'Lagoa de Alcaián' ou 'Braña Rubia', que é un "excepcional territorio cunha rara poboación botánica e non poucos endemismos, debido á súa peculiar xeolóxía de rochas ultrabásicas". Un espazo que, ademais, xa fora proposto polo bipartito para integrar a Rede Natura 2000. 

DELITO PENAL

ADEGA lembra que os danos ás especies protexidas poden ser constitutivos de delito, consonte o artigo 332 do Código Penal: "O que con grave prexuízo para o medio ambiente corte, talle, queime, arrinque, colleite ou efectúe tráfico ilegal de algunha especie ou subespecie de flora ameazada ou dos seus propágulos, ou destrúa ou altere gravemente o seu hábitat, será castigado coa pena de cadea de catro meses a dous anos ou multa de oito a 24 meses".

Desde a asociación esixen responsabilidade pola "eliminación" da poboación dunha especie en perigo de extinción, e a lesión doutras especies "moi sensibles e endémicas". No escrito dos ecoloxistas condenan o descoñecemento da Xunta, que din, "non pode ser escusa" e menos tratándose dunha poboación de Lycopodiella en Coristanco que estaba catalogada (cita no Herbario de Santiago SANT65621).