A cultura galega recorda a Xosé Neira Vilas no seu primeiro cabodano

Este domingo cumpreuse un ano da morte do escrito galego Xosé Neira Vilas, quen faleceu o 27 de novembro de 2015 aos 87 anos na súa casa natal de Gres, en Vila de Cruces (Pontevedra). Así, un ano despois do seu falecemento, desde o mundo da cultura galega lembran o seu legado: "Segue sendo un dos autores de referencia na literatura galega contemporánea", subliñou o director xeral da editorial Galaxia, Víctor Freixanes, en declaracións a Europa Press.

Este escritor e xornalista tamén destacou de Neira Vilas que "ten un público moi fiel e moi querido, sobre todo no ámbito dos primeiros lectores". E é que sostén que estes descobren a literatura galega a través da súa obra 'Memorias dun neno labrego'.

En concreto, Freixanes realizou estas declaracións o mesmo día no que o secretario xeral de Política Lingüística, Valentín García, participou no acto conmemorativo do primeiro aniversario da morte do tamén autor de 'Cartas a Lelo'.

'Memorias dun neno labrego' non é só a obra máis coñecida do escritor crucés, senón que tamén é a máis vendida e traducida da literatura galega, ademais de ser considerada a peza inaugural da creación infantil e xuvenil na nosa lingua.

A prolífica obra de Neira Vilas céntrase na emigración e no rural, dous aspectos moi presentes na súa vida. En 1949, o escritor emigrou, como tantos outros, da Galicia rural á Arxentina, onde estudou Xornalismo e comezou a relacionarse con intelectuais galegos como Luís Seoane, Rafael Dieste ou Blanco Amor.

En 1961, ano de publicación do seu 'best seller', fundou xunto á súa esposa, a tamén escritora Anisia Miranda, a editorial Follas Novas. Ese mesmo ano marchou a Cuba, de onde non volvería ata 1992, cando se asentou de novo na súa parroquia natal, Gres, desde onde dirixiu a Fundación Xosé Neira Vilas.

Neira Vilas foi membro da Real Academia Galega e doutor honoris causa polas Universidades da Coruña e A Habana. Recibiu numerosas condecoracións como Premio da Crítica Española e premio da Crítica Galega, así como as medallas Castelao, Pedrón de Honra e Celanova Casa dos Poetas.

'QUIQUE NA ALDEA'

O pasado 25 de novembro, como primeiro acto de homenaxe ao defunto escritor galego, presentouse unha obra póstuma de Neira Vilas nun acto ao que asistiu o presidente da Xunta, Alberto Núñez Feijóo.

'Quique na aldea' é o título deste conto, cuxo protagonista é distinto ao coñecido Balbino de 'Memorias dun neno labrego'. En concreto, este narra a historia dun neno que descobre a aldea nunhas vacacións cos seus avós.

"Hai xente que non tivo a sorte de nacer no rural, coma Quique, e é moi bo que a xente da cidade veña coñecelo", apuntou o presidente galego, que lembrou como Neira Vilas "nunca esqueceu a súa aldea".