#Claves de la semana

Miguel Anxo Fernández recibe o Premio 'Eduardo Blanco Amor' por 'Blues para Moraima'

O certame, dotado con 12.000 euros e unha escultura do artista ourensán Acisclo Manzano, está organizado pola Deputación de Ourense. 


|

Premioeduardoblancoamor

// Alberte Paz


O escritor, ensaísta e investigador cinematográfico Miguel Anxo Fernández (O Carballiño, 1955) vén de recibir no Liceo de Ourense o XXXV Premio de Novela Longa 'Eduardo Blanco Amor', pola súa obra 'Blues para Moraima'. O certame, dotado con 12.000 euros e unha escultura do artista ourensán Acisclo Manzano, está organizado pola Deputación de Ourense.


No seu discurso, o presidente da Deputación, Manuel Baltar, felicitou a Miguel Anxo Fernández, reivindicando a súa figura de "ourensán coñecido polo seu inxente labor no eido do cine galego, desde os comezos do cineclubismo no Carballiño, incansable comunicador e crítico recoñecido, doutor en Comunicación audiovisual pola Universidade de Vigo e docente da súa especialidade na Facultade de Ciencias Sociais e da Comunicación de Pontevedra".


O xurado do premio elixiu por maioría a obra Blues para Moraima de entre 22 novelas presentadas ao premio, subliñando "a axilidade narrativa, o tratamento histórico dunha época e a introdución do tema do cine e a televisión como canle de desenvolvemento dunha intriga que atrapa ao lector". Asemade, o xurado destacou "o punto de vista sobre o exilio e a vivencia artística desde a diáspora, factor de coincidencia coa biografía de Eduardo Blanco Amor".


FUNDACIÓN 'BLANCO AMOR'


No acto, que contou con representantes dos ámbitos institucional, social e cultural, Manuel Baltar remarcou que Ourense "forma parte substancial dos centos de páxinas xornalísticas e literarias que Eduardo Blanco Amor nos legou, e no Centro Cultural "Marcos Valcárcel" custódianse algúns dos seus orixinais, o arquivo, a biblioteca, obxectos persoais, o valioso legado do escritor a disposición de investigadores".


Asemade, Baltar avanzou que neste mesmo centro cultural "estará a Fundación 'Eduardo Blanco-Amor', cuxos estatutos vimos de aprobar no pasado pleno da Deputación, o que nos permitirá dar maior relevo á figura e á obra de tan ilustre ourensán".



Premioblancoamordeputacionourense

// Alberte Paz


Manuel Baltar dixo que esta fundación "nace con vontade integradora, para unir e aglutinar esforzos, para afondar no estudo" e "para que desde os diversos mundos blancoamorianos, da poesía á novela, da fotografía ó ensaio, da prosa literaria ao verbo de combate e reflexión nos xornais, os seus saberes brillen con intensidade e cheguen ás novas xeracións".


Tamén tivo palabras de recoñecemento o presidente do goberno provincial para os concellos, "que foron e seguen sendo alicerces, non só deste premio senón da nosa identidade como pobo, da nosa lingua e da nosa cultura. O propio, o noso, pasa polo poder local. As iniciativas xorden nos concellos, non só nas grandes cidades e vilas, senón nas pequenas corporacións rurais", e enfatizou que a quen lle corresponde "coordinar e apoiar esa fervenza de creatividade, ese potencial de cultura, é aos gobernos provinciais".


HOMENAXE A BLANCO AMOR


Por outra banda, con motivo do 37º cabodano do pasamento de Eduardo Blanco Amor, autoridades e persoeiros do mundo da cultura galega, renderon homenaxe ao escritor ourensán, nun acto de lembranza no cemiterio de San Francisco.


O vicepresidente da Deputación de Ourense, Rosendo Fernández destacou na súa intervención o labor que realiza o goberno provincial para "reivindicar a obra e figura do escritor que inmortalizou Auria coa súa obra.


A tradicional ofrenda floral na campa onde está soterrado o autor de A Esmorga é un evento que se celebra desde o ano 2004. Nesta XIV xornada de homenaxe a Blanco Amor tamén participaron o presidente do PEN Galicia, Luis González Tosar; o secretario xeral de Cultura, Anxo Lorenzo; o alcalde do Concello de Ourense, Jesús Vázquez, e alumnos do IES "Blanco Amor", que celebra o seu 50º aniversario.

relacionada ​Ourense contará cun museo da lingua galega protagonizado polos Bolechas
relacionada ​A Deputación de Ourense asina un convenio de colaboración co Liceo
Última hora

Sin comentarios

Escribe tu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Última hora
Cabeceralomasleido 1
Cabecerarecomendados 1

Galiciapress
Plaza de Quintana, 3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal - Política de Cookies - Política de Privacidad - Configuración de cookies - Consejo editorial - Publicidad
Powered by Bigpress
CLABE