Villares e Gómez-Reino coinciden na necesidade de "liderados compartidos"

O portavoz parlamentario de En Marea, Luís Villares, mostrouse partidario de manter a pluralidade no liderado do partido instrumental aínda que recoñeceu que a posición desta "dirección colexiada" poderá ser trasladada á cidadanía "de forma única ou plural".

Neste punto, lembrou que el "sempre" quixo ocupar a posición de "suscitar consensos" e non xerar "disensos" no proxecto de unidade popular. "Eu farei o que fixen ata agora, que é procurar axuntar as sensibilidades de todo o espazo", manifestou para destacar que estará "na posición que os inscritos de En Marea queiran que estea".

Villares pronunciouse deste xeito nunha rolda de prensa ofrecida este venres e previa á celebración do plenario deste sábado, no que o partido instrumental aprobará o seu documento político e o regulamento para a elección da súa dirección. Así, o principal punto de debate son as incompatibilidades que as persoas poden ter para presentarse nas listas ao Consello das Mareas, que rexerá a formación.

Respecto diso, o portavoz parlamentario asegurou que "non se trata dunha cuestión concreta de bicefalias" senón de "deseñar de forma moito máis extensa cal debe ser o perfil dos órganos de dirección". "Cremos que é necesario compaxinar a necesidade de ter portavocías coa pluralidade desta organización", manifestou para sinalar que a decisión a terán os inscritos.

Neste sentido, lembrou que "a dirección política de En Marea por definición é plural". Así, subliñou que os dous órganos de dirección deseñados polos textos aprobados na asemblea fundacional celebrada en xullo en Vigo, o Consello das Mareas e a Coordinadora, teñen "carácter colexiado".

Por iso, deixou claro que, "a día de hoxe", En Marea "non ten desenvolvido, nin a nivel regulamentario nin a nivel dos textos de Vigo figuras de carácter unipersonal" nin para regular "unha especie de Secretaría Xeral" nin para ostentar o que podería ser a "responsabilidade de organización". "Non está encima da mesa un modelo ou outro, porque os dous órganos de dirección que temos son colexiados", manifestou ao ser preguntado sobre a fórmula de liderado de En Marea.

TRASLADAR A POSICIÓN POLÍTICA

A partir de aí, considerou que "o importante" é "como se fixa a posición política de carácter colexiado" que "despois poida ser trasladada de forma única ou plural". "Nós xa anticipamos que somos partidarios de que existan órganos plurais de portavocía nos que se poida levar a cabo esa función de comunicación", indicou.

Así, recoñeceu que, ao longo destes meses nos que En Marea estivo dirixida por unha coordinadora provisional, estimábase que "houbese máis xente que repartise o peso da comunicación". "E iso, é algo que, a partir da aprobación do regulamento e do establecemento dunha nova dirección, podemos solucionar", sinalou para considerar "bo" repartir "as mensaxes" e a "comunicación a nivel público".

"Porque hai funcións propias do grupo parlamentario e funcións propias da organización que tamén deben ser repartidas", apuntou para referirse tamén á necesidade de dar "visibilidade da igualdade de xénero". "Todo iso forma parte da nosa cultura política e estará presente a partir da elección da nova dirección", apuntou.

CONSENSO

Por todo iso, Villares mostrouse partidario de que a lista que salga do plenario deste sábado "poida axuntar as sensibilidades" existentes en En Marea tras o que incidiu en que el estará no lugar que "queiran" os inscritos" e que, como fixo ata agora, "buscará o entendemento entre espazos".

"A CIDADANÍA DEMANDA LIDERADOS COMPARTIDOS"

O deputado de En Marea no Congreso Antón Gómez-Reino defendeu que a cidadanía "demanda" liderados "compartidos" en En Marea, en liña coas manifestacións realizadas de novo este venres polo alcalde da Coruña, Xulio Ferreiro.

Tras unha reunión entre ambos no Consistorio coruñés, e a preguntas dos xornalistas sobre a celebración do plenario que terá lugar este sábado en Santiago, o alcalde incidiu en que no partido instrumental non houbo "un portavoz nacional".

"Por tanto do que imos falar mañá non é de ningunha persoa concreta, imos falar de que tipo de organización queremos", apostilou.

Por iso, considerou que se está "desenfocando un pouco" o debate ao redor desta cuestión, mentres volveu a defender que o liderado colectivo "vai no ADN" desta organización.