#Claves de la semana

​O PP de Vigo sairá "á rúa" contra a área Metropolitana de Abel Caballero

Os populares critican o rexedor por "boicotear" o ente supramunicipal "desde dentro". Mentres, Marea de Vigo reprocha o "esperpento" de PSOE e PP.


|

Munozperezcaballerovigo


O grupo municipal do PP no Concello de Vigo confirmou este luns que poñerá en marcha unha campaña informativa para "desmontar as mentiras" de Abel Caballero sobre a área Metropolitana, e para "informar os cidadáns" de que é o rexedor olívico o que pretende "boicotear" o ente supramunicipal "desde dentro".


Nunha rolda de prensa, a portavoz municipal 'popular', Elena Muñoz, explicou que o seu grupo iniciará unha rolda de contactos con organizacións e colectivos da cidade, e que sairá "á rúa" para explicar aos vigueses "o que está a pasar", unha iniciativa que xa levou a cabo, hai uns días, a alcaldesa de Mos, Nidia Arévalo.


Segundo a concelleira do PP, Caballero está a utilizar a área Metropolitana "como un instrumento político", e a confrontación como parte dunha "estratexia" para "tender unha cortina de fume sobre os verdadeiros problemas da cidade". "Para o alcalde, o fin xustifica os medios, non lle importa mentir, caia quen caia", denunciou.


Con respecto ao anuncio da Xunta de interpoñer recurso contra a constitución da área, Elena Muñoz sinalou que é "unha decisión absolutamente coherente" e que "o que sorprende" é que Caballero entrase "en pánico", cando foi el quen retou o goberno galego a acudir á vía contencioso administrativa. "Hai que ir aos tribunais porque o alcalde de Vigo non deu outra opción", sentenciou.


O CONTENCIOSO "É A VÍA LÓXICA"


O grupo municipal Marea de Vigo criticou este luns o "esperpento" que escenifican tanto PP como PSOE con respecto ao Área Metropolitana, e lamentou a falta de concreción do convenio do transporte, que deu lugar a "diferenzas substanciais de interpretación" entre o Concello olívico e a Xunta de Galicia.


Ante esas diferenzas, Marea considera que o contencioso "é a vía lóxica", á vez que lembrou que foi o propio alcalde olívico, Abel Caballero, quen "pedía a formulación desta denuncia no contencioso e comprometíase a acatar o seu resultado".


O portavoz de Marea, Rubén Pérez, criticou a posición dos populares, por negar que a entrada de Vigo no transporte metropolitano é unha realidade, cando a lei aprobada "contén o convenio esixido entre Concello e Xunta".


Por outra banda, acusou ao alcalde, Abel Caballero, de asinar "con pouca cautela" ese convenio, no que hai unha "interpretación moi aleatoria" sobre as tarifas dos billetes e as bonificacións que deben asumir as administracións local e autonómica.


Así mesmo, Marea de Vigo tamén cuestionou a participación dunha empresa privada "á que quedan dous anos de concesión" nese acordo de transporte, e a falta de claridade no que respecta ao proceso de integración do bus urbano, a cesión de competencias de transporte á Área, etc.


Por todo iso, Rubén Pérez reclamou a convocatoria dun novo pleno do ente supramunicipal, unha sesión extraordinaria na que dirimir "a cuestión do transporte". "A importancia da área debería estar por encima das siglas pero se a vontade, tanto do PSOE como do PP, non cambia, seguramente este novo intento de construción da área Metropolitana de Vigo volva fracasar", advertiu.


CABALLERO NON ESTÁ "NADA PREOCUPADO"


Pola súa banda, Abel Caballero, asegurou este luns que non está "nada preocupado" polo anuncio da Xunta de interpoñer recurso contencioso administrativo contra a constitución da área Metropolitana, e acusou ao goberno galego e ao presidente, Alberto Núñez Feijóo, de pretender "obstaculizar" o ente supramunicipal "con métodos espúreos".


En todo caso, Caballero precisou que "non hai ningún recurso presentado" e que, a día de hoxe, o único que hai é "unha nota de prensa" anunciando a intención da Xunta de acudir á vía contenciosa. "É a Xunta facendo política contra Vigo", reiterou.


"Non estou nada preocupado. A área Metropolitana é lexítima", insistiu o rexedor olívico que, con todo, admitiu que é "inconveniente" que haxa seis dos 14 alcaldes (os do PP) que non quixesen sentar na Xunta de Goberno.

relacionada Recrudécese a hostilidade entre a Xunta e Caballero pola Área Metropolitana
relacionada ​Rueda insiste no bloqueo á Área Metropolitana de Caballero
relacionada Caballero: "A Área Metropolitana está constituída e plenamente operativa"
Última hora

Sin comentarios

Escribe tu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Última hora
Cabeceralomasleido 1
Cabecerarecomendados 1

Galiciapress
Plaza de Quintana, 3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal - Política de Cookies - Política de Privacidad - Configuración de cookies - Consejo editorial - Publicidad
Powered by Bigpress
CLABE