O PSOE favorecerá a investidura de Noriega e descarta rotundamente pactar co PP
sábado, 30 de mayo de 2015, 00:53
O candidato do PSOE á Alcaldía de Santiago, Paco Reyes, asegurou este venres que o grupo que lidera favorecerá a investidura do aspirante por Compostela Aberta, Martiño Noriega, ao tempo que descartou rotundamente que poida pechar un pacto co PP.
"Descartamos que exista unha posibilidade diferente a que a persoa que encabezou a lista de esquerdas máis votada, e que é a lista máis votada, non sexa alcalde", remarcou, ao ser preguntado polos xornalistas despois de que o alcalde en funcións, o popular Agustín Hernández, revelase que tenteara o PSOE.
Na mesma liña, cuestionado sobre a manifestación convocada para o sábado para pedir "un pacto de centro" entre o PP e o PSOE, Reyes opinou que "a cidadanía é moi libre" de tomar esta decisión, pero a súa formación só ten "unha palabra" e se "vai cumprir".
Neste sentido, recordou que en campaña explicitar que favorecería que puidese gobernar o Pazo de Raxoi "a lista de esquerdas máis votada". "Comprometémonos ante a cidadanía", recalcou o concelleiro socialista, sen despexar se na súa vontade estaría entrar no goberno de Martiño Noriega.
Así, ante o inicio das reunións a semana próxima, asegurou que o PSOE acudirá con "espírito positivo e de diálogo" a "escoitar" a visión de Compostela Aberta. Calquera pacto, sinalou, deberá ter como base "o programa de goberno e o proxecto de cidade".
"DISPOSTOS A ESCOITAR"
Dito isto, ante a insistencia dos informadores, indicou que existen "moitísimas posibilidades", ao tempo que evidenciou que aínda "non se abriu a negociación".
"Nós estamos dispostos" a escoitar e a dialogar sempre", sostivo, e evitou afondar no asunto dende o convencemento de que, por "respecto institucional", o primeiro que debe coñecer a súa postura é o propio Martiño Noriega.