O Rei Felipe VI preside a entrega de reais despachos na Escola Naval de Marín
jueves, 16 de julio de 2015, 22:38
O Rei Felipe VI, acompañado do Presidente da Xunta Alberto Nuñez
O Rei Felipe VI presidiu este xoves na Escola Naval Militar de Marín (Pontevedra) o acto de xura de bandeira dos alumnos de primeiro curso e a entrega de reais despachos aos novos oficiais da Armada, que ademais conforman a primeira promoción de alumnos do Centro Universitario da Defensa (CUD) que obtén simultaneamente un despacho de oficial e o título de grao en Enxeñaría Mecánica pola Universidade de Vigo.
O monarca, que acudiu sen a Raíña Letizia, foi recibido coas 21 salvas de honra e a interpretación do Himno Nacional. Á súa chegada á Escola, Felipe VI foi saudado polo almirante xefe do Estado Maior da Armada, o ministro de Defensa, o presidente da Xunta e o comandante director da Escola Naval.
Posteriormente, o Rei pasou revista ás brigadas de alumnos e mariñeiría formados na chaira do centro que, inmediatamente desfilaron ante el para dar comezo á cerimonia oficial. En total, finalizaron os seus respectivos estudos e recibiron os reais despachos 80 alumnos e xuraron bandeira un total de “48 cabaleiros e unha dama”.
Tratábase da primeira vez que Felipe VI acudía como monarca a este acontecemento, posto que a súa anterior visita á Escola Naval Militar, o pasado mes de setembro, foi con motivo do 25 aniversario da súa promoción de gardamarinas correspondente a 1989, ano no que o actual Monarca obtivo, tras catro meses de formación mariña e unha singradura a bordo do buque escola Juan Sebastián de Elcano, o seu despacho de alférez de navío.
FEITO HISTÓRICO
Un feito “histórico notable”, destacado polo comandante director da Escola Naval, Juan Luís Sobrino, é que esta foi a primeira cerimonia na que todos os alumnos atópanse concernidos polo novo plan de carreira establecido na Lei da Carreira Militar de 2007. Por tanto, foi a primeira vez na que os alumnos obteñen un título universitario do sistema educativo xeneral, maioritariamente, o de enxeñeiro mecánico pola Universidade de Vigo.
Esta titulación foi impartida polo Centro Universitario da Defensa, adscrito á citada universidade, establecido nesta Escola no primeiro semestre de 2009, e que comezou a súa navegación no curso 2010-2011.
Segundo destacou o comandante director da Escola, José Luís Sobrino, estes oficiais finalizaron unha formación académica “similar nas súas tres cuartas partes á que até o ano 2010 se realizaba neste centro”.
Ao dirixirse a eles por última vez como alumnos, no seu discurso o comandante director lembroulles tres aspectos fundamentais que deben “coidar e propiciar a partir de hoxe”: “exemplaridade, a resiliencia e a humildade”.
Este acto militar coincide coa celebración do Día da Virxe da Carmen, patroa da Armada, ocasión coa que acudiu puntualmente ao recinto castrense o buque escola Juan Sebastián de Elcano, pondo fin ao seu 86 cruceiro de instrución. Ademais, fronte á Escola permaneceu fondeada a fragata Méndez Núñez e os patrulleiros Serviola e Tabarca.