Vence ve ben que Beiras se postule, pero pide antes "acordo político"
martes, 15 de septiembre de 2015, 08:01
O voceiro nacional do BNG, Xavier Vence, manifestou que espera que Anova e o seu líder, o veterano político nacionalista Xosé Manuel Beiras, "sumen e contribúan" a crear unha candidatura galega con entidade xurídica que poida conformar un grupo parlamentario propio no Congreso dos Deputados e, neste sentido, viu ben que o deputado e que fóra cofundador da súa organización sexa candidato nun proceso de primarias para elixir a lista de unidade.
Na súa intervención a preguntas dos medios, en relación ás declaracións de Beiras na entrevista da Radio Galega nas que non descartou ser candidato ao Congreso, Xavier Vence considerou que "hai grupos que poñen por diante candidatos ou siglas", e xulgou que o proceso "ten que madurar doutro xeito", cun acordo político e, posteriormente, unha convocatoria de primarias.
Para Vence, "non se empeza a casa polo tellado", polo que debería haber primeiro un "acordo político" que asente as bases para esa candidatura, ao respecto do que tamén defendeu a "confluencia" das plataformas cidadás que son partidarias dunha candidatura galega (Iniciativa pola Unión e Encontro por unha Marea Galega).
O líder do Bloque cre que, en todo caso, Anova e Beiras "obviamente deberían participar nese proceso de primarias" para a elección de candidatos para as eleccións xerais e confiou en que a formación que no seu día naceu dunha escisión da fronte nacionalista "se comprometa" con este proceso.
Vence reivindicou que o BNG renunciou ás súas "siglas" e ao seu "protagonismo" en favor dunha "candidatura galega e plural". "E nesa dirección seguiremos traballando", remarcou o político nacionalista, quen advertiu de que agora "o tempo empeza a apremar".
Desta forma, como se fixo na mesa política do sábado pasado na que participaron ata oito formacións políticas partidarias dunha confluencia, o voceiro nacional do Bloque insistiu na necesidade de actuar con "xenerosidade".
ENQUISA
Por outro lado, preguntado pola enquisa de Sondaxe para 'La Voz de Galicia', Vence manifestou que, a estas alturas, "son só aproximacións", porque aínda hai "moitos espazos" que faltan por "definir". A enquisa dá unha vitoria ao PP, pero quedaría lonxe da maioría absoluta, e ofrece un escenario fragmentado.
"O que é obvio é que o Congreso vai ser máis plural", observou o voceiro nacional do Bloque, quen por iso, insistiu na necesidade de que Galicia conte cun "grupo galego" co fin de ter "marxe para a negociación política".