A facturación do sector servizos medra un 5,9% en Galicia
viernes, 18 de septiembre de 2015, 23:47
O sector servizos rexistrou en Galicia en xullo un aumento da súa facturación do 5,9% en relación co mesmo mes de 2014, un incremento unha décima inferior ao rexistrado a nivel estatal (6%), segundo os datos provisionais publicados este venres polo Instituto Nacional de Estatística (INE).
Pola súa banda, a ocupación no sector na Comunidade galega aumentou un 1,4% en xullo respecto ao mesmo mes de 2014, aínda que este incremento é inferior ao da media estatal (+2%).
De media do que vai de ano, a facturación no sector servizos aumentou na Comunidade galega un 4,1%, por debaixo da media estatal nestes primeiros sete meses do ano que se sitúa nun 4,8%.
Así mesmo, no que vai deste 2014 o emprego creceu un 1,1% na Comunidade galega, fronte ao incremento medio do 2% en toda España. En cambio, a taxa de ocupación en Galicia elevouse ata o 0,8% en xullo en comparación co mes anterior de xuño.
DATOS ESTATAIS
No conxunto do Estado, o sector servizos rexistrou un aumento da súa facturación do 6% o pasado mes de xullo en relación ao mesmo mes de 2014, segundo datos provisionais publicados este venres polo Instituto Nacional de Estatística (INE).
Esta taxa, coa que os servizos encadean xa 23 meses de ascensos, é 1,6 puntos inferior á de xuño, cando as vendas do sector repuntaron un 7,6%, a súa taxa interanual máis alta dende febreiro de 2008.
Corrixidos os efectos estacionais e de calendario, a facturación dos servizos rexistrou o pasado mes de xullo un avance interanual do 5,7%, taxa tres décimas inferior á rexistrada en xuño (6%).
Os datos do INE reflicten que o emprego no sector servizos aumentou no sétimo mes do ano un 2% en taxa interanual, unha décima menos que en xuño. Con este repunte, o sector suma xa 15 meses de crecemento interanual da ocupación despois de case tres anos de caídas.
En termos mensuais (xullo sobre xuño) e eliminado o efecto de calendario e a estacionalidade, a facturación do sector servizos creceu un 0,5%, fronte ao repunte do 0,7% experimentado en xuño e o avance do 0,8% dun ano antes.
SOBE A FACTURACIÓN DO COMERCIO
O comercio presentou o pasado mes de xullo un aumento interanual da súa facturación do 6,1%, mentres que os outros servizos rexistraron un repunte do 5,9%.
O aumento da facturación do comercio debeuse principalmente ao incremento nun 19% da cifra de negocios da venda e reparación de vehículos e motocicletas, que é a actividade que máis sobe, seguida do comercio por xunto (+5,6%) e o comercio minorista (+3,3%).
Dentro dos outros servizos, as vendas aumentaron en todos os sectores. As actividades administrativas e servizos auxiliares rexistraron o maior repunte da facturación (+7,6%), seguido da hostalaría (+5,8%), as actividades profesionais (+5,7%), transporte e almacenamento (+5,6%) e información e comunicacións (+5,3%).
En canto á ocupación, o emprego no sector servizos rexistrou o pasado mes de xullo un crecemento interanual do 2% grazas, sobre todo, aos avances da ocupación nas actividades administrativas (+4,5%), información e comunicacións (+2,7%) e comercio almacenista (+1,9%).
En taxa mensual, o emprego nos servizos subiu un 0,3%, cun incremento do 0,3% tanto para o comercio coma para os outros servizos.
TODAS AS COMUNIDADES ELEVAN VENDAS E EMPREGO
O pasado mes de xullo, todas as comunidades autónomas presentaron unha evolución positiva da cifra de negocios do sector servizos. Os aumentos máis importantes rexistráronse en Baleares (+8,5%), La Rioja (+8%) e Cantabria (+7,3%), e os menores, en Canarias (+2,3%) e Castilla e León (+3,1%).
En canto ao emprego, todas as comunidades presentaron no sétimo mes do ano taxas interanuais positivas respecto ao mesmo mes de 2014. A Rioja e Murcia foron as rexións onde máis aumentou a ocupación, con taxas do 3,7% e do 3,2%, respectivamente. As que menos emprego crearon foron Asturias e Castilla-La Mancha, con avances do 0,8% e do 0,9%, respectivamente.