Detido un falanxista, veciño de Santiago, por ameazar nas redes a Martiño Noriega
sábado, 19 de septiembre de 2015, 22:50
Un veciño de Santiago, Jesús Enrique M.H., de 48 anos, foi detido por ameazas en redes sociais ao alcalde da capital galega, Martiño Noriega (Compostela Aberta). Tras pasar a disposición xudicial este sábado, quedou en liberdade con cargos.
Fontes coñecedoras da investigación confirmaron a Europa Press que este veciño de Santiago desde hai 20 anos, natural da Pobra, ten un proceso de embargo desde o ano 2005 por falta de pagamento de impostos municipais por valor de 1.500 euros.
Entre as ameazas que proferiu o detido, advertía ao alcalde, ao que chamou "vermello de merda", que podía acabar nunha "cuneta" como en 1939, en referencia á represión franquista.
Tamén lle suxeriu que "rezase" ante a hipotética posibilidade de que un tractorista "se confundira" e "acelerara" o seu vehículo para atropelalo -a pasada semana centos de gandeiros colapsaron cos seus tractores Santiago para reclamar un prezo xusto para o leite, nunhas protestas que apoiou o rexedor-.
Se se rastrexa por Internet o nome do detido aparece vinculado con listas da Falanxe Española como suplente en procesos electorais.
Jesús Enrique M.H. foi detido pola Policía Nacional e posto a disposición do xulgado número 1 de Santiago este sábado. As mesmas fontes indicaron a Europa Press que o alcalde recibiu, desde a súa toma de posesión, outras ameazas por escrito a través de carta.
Estas advertencias, segundo explicaron estas fontes, están relacionadas coa cuestión relixiosa e a postura do rexedor respecto do aborto.
Coa chegada de Compostela Aberta ao Pazo de Raxoi, o alcalde e o Goberno local deixou de acudir a actos relixiosos, como ocorreu coa ofrenda ao apóstolo o pasado 25 de xullo. Doutra banda, tamén foi polémica a decisión do Executivo de non continuar con axudas a grupos provida.