A fiscalía pide imputar a Louzán, ex presidente da Deputación de Ponteveda, pola Operación Patos
lunes, 21 de septiembre de 2015, 22:59
O Ministerio Público emitiu un informe no que pide que se tome declaración en calidade de imputado a medio centenar de empresarios, funcionarios e políticos, entre os que están o ex presidente da Deputación de Pontevedra, Rafael Louzán e o ex vicepresidente da Deputación, José Manuel Figueroa, a quen o fiscal atribúelles supostos amaños de contratos e obras públicas e a recepción de agasallos.
Na relación da Fiscalía figuran nomes como a delegada da Xunta, María José Bravo Bosch e outros cargos políticos da Xunta e do Concello de Vigo. Nalgúns casos as sospeitas estarían fundadas na recepción de agasallos e noutros, como Louzán, pola concesión de obras na provincia.
Unha vez que xa se levantou o segredo de sumario para as partes, a Fiscalía solicita que a causa se divida en pezas separadas xa que entende que debe haber inhibicións en favor dos xulgados de Pontevedra, Ponteareas, Santiago de Compostela e Ourense.
A bautizada como Operación Patos investiga delitos de prevaricación, cohecho e tráfico de influencias na adxudicación de contratos públicos e está coordinada pola titular do Xulgado de Instrución número 7 de Vigo, que conta coa colaboración da Fiscalía.
A empresa Cespa, que pertence ao grupo Ferrovial, atópase no epicentro desta investigación contra a corrupción do mesmo xeito que a constructora Eiriña, así como empresas do seu entramado.
A Fiscalía tamén pide que se traslade aos xulgados pontevedreses a investigación por un suposto tráfico de influencias en relación con contratacións en Cespa e as pescudas por supostas irregularidades na tramitación de subvencións a Ence.