Lores, "Que investiguen todo o que queiran. Non van atopar nada delictivo no meu comportamento"

Redacción

viernes, 13 de noviembre de 2015, 00:15

O alcalde de Pontevedra, Miguel Anxo Fernández Lores (BNG), asegurou que está "moi tranquilo" e "encantado" de que se investigue "todo o que se teña que investigar, tanto patrimonial como fiscalmente", porque "non van atopar absolutamente nada delituoso desde o punto de vista político".

"Pódenme pór patas para arriba que o que vai caer é, máis ou menos, o solto que vos ía caer a todos vós", chanceou Lores nunha concorrida rolda de prensa, tras o rexistro de 13 horas ordenado este mércores pola xuíza Pilar de Lara en dependencias do Concello pontevedrés e tras coñecerse que a instrutora da operación Pokémon autorizou a Vixilancia Aduaneira a investigar o alcalde de Pontevedra e outros membros do seu goberno local.

O rexedor engadiu que de todo o que se coñece deste proceso xudicial "non hai nin sequera indicios", xa que, segundo dixo, fálase de contratos e renovacións "que non fixo este goberno municipal", polo que "aquí hai películas, pero non existe ningunha irregularidade respecto da empresa Aquagest en relación co Concello de Pontevedra nin con ningunha outra empresa". "Tranquilidade e normalidade", resumiu o alcalde nacionalista, que recordou que ata o ano 2017 non hai que renovar a concesión coa empresa concesionaria do servizo de augas.

Así mesmo, Fernández Lores afirmou sentirse "moi orgulloso" do seu traballo neste Concello e do de todos os seus compañeiros durante estes 16 anos. "Non temos absolutamente nada que ocultar do noso traballo", subliñou. "Ao contrario, estamos moi orgullosos do que levamos feito", agregou.

TEMPO RAZOABLE.

"Temos o máximo interese en que se investigue e se aclaren as cousas", insistiu o alcalde pontevedrés. "E se efectivamente hai que meter no trullo, que trinquen aos delincuentes que queiran, pero que aclaren as cousas nun tempo razoable", solicitou.

Neste sentido, Lores referiuse á importancia que teñen estes procesos que se dilatan no tempo, "facendo dano a moita xente inocente que non ten absolutamente culpa de nada e que non o merece", polo que pediu "celeridade" neste tipo de cuestións "que van deixando cadáveres polo camiño", apostilou.

A última mensaxe do alcalde da cidade do Lérez foi para "reivindicar a política", ao reafirmar o seu orgullo por exercer esta profesión.

RELACIÓN COAS EMPRESAS.

A preguntas dos xornalistas, o alcalde de Pontevedra explicou que "o normal" é que un concello que ten relación con moitísimas empresas "se reúna e nalgún momento poida comer con algunha empresa", algo que recoñeceu que non lle gusta. "A min gústame comer na miña casa", concluíu.

Pola súa banda, Vicente García Legísima, aclarou que a actuación dos funcionarios de Vixilancia Aduaneira o pasado mércores non foi un rexistro, xa que do que se tratou foi dunha petición de documentación que se lles facilitou sen ningún problema e criticou que desde o Xulgado non se dirixiron ao Concello por outras canles para solicitar esa documentación.