Cadenas ve "ata certo punto insólito" o caso entre De Lara e o avogado Conde-Pumpido
lunes, 14 de diciembre de 2015, 00:24
O presidente do Tribunal Superior de Xustiza de Galicia (TSXG), Miguel Ángel Cadenas, confesou este domingo que lle chamou a atención o ocorrido entre a xuíza Pilar de Lara co avogado Cándido Conde-Pumpido Varela e ve en todo o sucedido algo "que é ata certo punto insólito".
A maxistrada, que se ocupa de investigacións como a operación Pokemon e o caso Garañón, fixo unha serie de revelacións de correos electrónicos deste letrado, que representa actualmente ao líder do PSdeG, e o aludido recriminou a utilización "de forma sesgada" de comunicacións, por outro asunto, "persoais e privadas ocorridas nun ambiente de cordialidade, moito antes de asumir a defensa do señor Gómez Besteiro".
Conde-Pumpido é un dos avogados do líder dos socialistas galegos na causa centrada na urbanización da parcela do Garañón, que xerou a maior polémica urbanística que viviu Lugo nos últimos anos, porque foi levantada xusto á beira do Parque de Rosalía de Castro, o principal pulmón verde da cidade. Isto foi motivo de varios procesos xudiciais, manifestacións e innumerables encontróns políticos entre os distintos partidos.
A Gómez Besteiro, propietario dun piso nese lugar, achácalle De Lara a suposta comisión dos delitos de tráfico de influencias, prevaricación, suborno e contra a ordenación do territorio.
Miguel Ángel Cadenas recoñeceu estar sorprendido nunha entrevista emitida este domingo pola Cadea Ser en Galicia e, no caso de que existisen coaccións, recordou que hai mecanismos legais, "se isto ten unha repercusión máis ou menos directa na posición do xuíz ou do avogado, isto tería que ser resolto pola vía habitual, coa posibilidade dunha recusación", explicitou. "Ignoro -proseguiu- o que hai por baixo de toda esta situación, o que si quero deixar claro é que hai mecanismos legais en calquera sentido para que se isto ten unha transcendencia procesual, se resolva adecuadamente".
O presidente do TSXG confiou en que a instrución da Operación Pokemon, que leva Pilar de Lara e indaga sobre adxudicacións feitas desde administracións públicas a grupos empresariais, principalmente a Vendex, conclúa nun prazo curto de tempo. "Eu espero que si, que acabe pronto, non só polo tempo transcorrido, senón porque a investigación debe estar case terminada. Non é o conveniente para unha persoa que leve cinco anos imputada. Hai que coñecer as razóns".
Tamén sobre o xuízo polo caso Alvia apuntou Cadenas que podería celebrarse antes do verán de 2016 se a Audiencia Provincial da Coruña pecha a instrución e non hai novas imputacións. Sendo así, a vista oral "podería ser antes do verán ou inmediatamente despois do verán de 2016", avanzou, e avalou o traballo dos dous maxistrados que se ocuparon do caso, Luis Aláez e na actualidade Andrés Lago, porque son "intachables".