A Xustiza investiga se as tres monxas indias estaban retidas contra a súa vontade
martes, 26 de enero de 2016, 12:40
Tres relixiosas orixinarias da India permanecen nunha casa de acollida tras ser liberadas do seu presunto cativerio no convento das Madres Mercedarias de Santiago.
As tres relixiosas abandonaron o convento o pasado sábado, despois de que unha delas denunciase o pasado 7 de xaneiro que levaban anos retidas no convento, que "varias das súas compañeiras querían abandonar" a institución relixiosa e que "ata o momento non o conseguiran", por mor das ameazas de deportación que recibían por parte da súa superiora.
Cando a Policía desprazou un dispositivo ata o convento o pasado sábado, estas tres monxas decidiron abandonar a institución para poñerse baixo tutela xudicial. Outras dúas monxas tamén de orixe india, en cambio, decidiron permanecer no convento pola súa propia vontade, segundo apuntan fontes do arcebispado.
Polo de agora, dende o Tribunal Superior de Xustiza de Galicia informan de que non se ten producido ningunha detención nin se ten citado a ninguén para declarar. A investigación atópase en mans do xulgado de instrucción número 1 de Santiago, que intenta determinar se as monxas tiñan acceso ao seu permiso de residencia para poder saír do centro libremente.
DENDE O ARCEBISPADO NEGAN RETENCIÓNS ILEGAIS
Polo de agora, dende o arcebispado están valorando a conveniencia de realizar un comunicado oficial, pero xa adiantaron a Galiciapress que pola información de que dispoñen en ningún momento se pode falar de "retencións ilegais", nin de retirada de pasaportes, malos tratos ou coacción.
Segundo as fontes do arcebispado, trátase dun tema de cada unha destas persoas, que plantexaron a petición de dispensa dos votos relixiosos, algo que conleva "un trámite" e tempo.
MONXAS DEPORTADAS EN 2011
Pero o caso que acaba de aparecer podería non ser o primeiro. O xulgado de instrucción número 1 tamén está investigando os motivos que levaron á deportación en 2011 doutras dúas monxas orixinarias da India.
Estas dúas relixiosas tamén residían no convento das Madres Mercenarias e dispoñían de permiso de residencia, pero aínda así foron deportadas.
O convento de Santiago é o quinto que esta orde ten en España. As Mercedarias centran a súa vida relixiosa na contemplación. A crise de vocacións que ten baleirado progresivamente os conventos españois fixo que esta orde aceptara relixiosas da India e de México hai 13 anos.