Amplíase a alerta laranxa por temporal costeiro
domingo, 27 de marzo de 2016, 15:32
A Dirección Xeral de Emerxencias e Interior ampliou a alerta por temporal costeiro de nivel laranxa á provincia de Pontevedra a partir da tarde deste domingo. Tamén permanece o aviso activado no suroeste da Coruña.
Segundo informa a Axencia Estatal de Meteoroloxía (Aemet), a partir desta tarde, espérase mar combinada do oeste, con ondas de ata seis metros na provincia de Pontevedra. Ademais, no suroeste da Coruña haberá mar combinada do oeste-suroeste, coas que poderán chegar aos sete metros de altura.
No noroeste e oeste da provincia da Coruña, a Aemet actualiza o fenómeno meteorolóxico adverso por mar combinada tamén do oeste-suroeste, coas de cinco a seis metros, que poderán aumentar ata os sete.
Ademais, a Axencia Estatal de Meteoroloxía dá por finalizado o aviso laranxa na costa de Lugo.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos municipios das provincias afectadas, ás deputacións e servizos de emerxencias.