O PPdG quere recuperar votos nas cidades, e para iso acaba de marcarse como obxectivo "desenmascarar" a "nula xestión" das mareas.


Así o considerou este mércores Miguel Tellado, coordinador de campaña do partido, despois de reunirse con alcaldes e voceiros populares de localidades de máis de 30.000 habitantes.


Asegura que os populares están "francamente preocupados" pola xestión das mareas nas cidades. Puxo como exemplo que ve ao alcalde de Ferrol, Jorge Suárez (Ferrol en Común) "máis preocupado pola retirada dun busto do Rei emérito" que polo que "máis afecta aos veciños de Ferrol", o desemprego.


No tocante á Coruña, Tellado recriminoulle ao goberno de Marea Atlántica que non "é quen de aprobar os orzamentos", sobre Santiago asegurou que o alcalde é "incapaz de tapar con chapapote" as "múltiples fochancas que ten a cidade".


A nivel nacional recoñeceu que dende o PP "non sempre acertamos" pero están perfectamente convencidos de que "Pablo Iglesias non será en ningún caso mellor presidente que Mariano Rajoy" e, "desde logo, Xosé Manuel Beiras non sería mellor presidente que Alberto Núñez Feijóo". 



POWERED BY BIGPRESS