En Marea ensina candidato esta semana
martes, 2 de agosto de 2016, 10:53
O alcalde de Santiago, Martiño Noriega, e o seu homólogo na Coruña, Xulio Ferreiro, anunciaron que o candidato de En Marea para as eleccións galegas do 25 de setembro darase a coñecer "esta semana", tendo en conta que ao longo desta semana se iniciará o proceso de primarias, tal e como acordou a coordinadora provisional.
"Esta semana terán que lanzarse as primarias e teremos que saber quen está disposto a presentarse", explicou o rexedor herculino, quen tamén se pronunciou sobre os escasos dous meses que restan ata a celebración dos comicios autonómicos.
En concreto, xulgou que dispoñer dun período de tempo breve non influirá negativamente na campaña do candidato, pois --ao seu xuízo-- "non terá problema en darse a coñecer".
EXPOSICIÓN PÚBLICA
Con todo, o primeiro edil compostelán admitiu que non considera positivo traballar con "prazos tan curtos", aínda que neste caso opinou que a "exposición pública" do candidato das mareas cunha maior antelación podería converterse en algo "negativo" por tratarse do "inimigo para bater polo PP".
Adicionalmente, acerca da persoa que haberá de medirse ao candidato do PPdeG á reelección, Noriega defendeu unha vez máis unha candidatura de consenso "asentada na cooperación", aínda que indicou que se trata dun tema que se abordará na reunión e que se determinará esta mesma semana.
Pola súa banda, o alcalde da Coruña advertiu de que espera que "ninguén senta a necesidade de competir" contra un candidato que "reúna" un "amplo consenso" das distintas "sensibilidades" que conforman En Marea "actualmente".
PRIMEIRA REUNIÓN DA XESTORA
Estas declaracións realizáronas este luns, a preguntas dos xornalistas, previamente á reunión da primeira coordinadora provisional de En Marea, na que se estableceu que ao longo desta semana se iniciará o proceso de primarias.
Segundo informou En Marea nun comunicado, o proceso desenvolverase segundo "o regulamento aprobado o sábado na Marea Constituínte" celebrada en Vigo e nel poderán participar calquera persoa que asine "o manifesto dos tres alcaldes".
Asismismo, a coordinadora provisional, tamén elixida o pasado fin de semana na cidade olívica, celebrará outro encontro o vindeiro mércores no que nomearán un equipo que se encargará da elaboración do programa e outro que levará as rendas da campaña electoral.
Na reunión, a coordinadora, formada por Xosé Manuel Beiras, Rubén Pérez, Carmen González, Iago Martínez, Ledicia Piñeiro, Manolo Antelo, Eva Solla, Rafa Dopico, Mariajo Bóveda e Manolo Barreiro; estivo acompañada polos alcaldes de Santiago, Martiño Noriega, e da Coruña, Xulio Ferreiro.