A Deputación de Lugo ofrece 650 prazas de teleasistencia gratuíta a dependentes e maiores
martes, 6 de septiembre de 2016, 12:00
O presidente da Deputación de Lugo, Darío Campos, anunciou este luns a ampliación da teleasistencia gratuíta para persoas dependentes e maiores con 650 prazas máis, que se suman ás case 1.000 existentes.
As persoas interesadas en acceder a este servizo do ente provincial poderán presentar a súa solicitude a partir deste martes.
Campos contrapuxo a oferta da Deputación coa da Xunta en base a dous eixos. Por unha banda, explica que a provincial é gratuíta, fronte ao copago da autonómica. Por outra banda, a primeira aprobarase para todas aquelas persoas que o necesiten segundo as valoracións que realicen os traballadores sociais, mentres que a segunda redúcese ao ámbito das persoas que teñen recoñecida a dependencia.
"Trátase dunha prestación totalmente gratuíta dirixida a maiores e persoas que sofren algunha limitación en canto á súa anatomía", expuxo Campos.
A valoración "non será un trámite administrativo", senón que "será unha valoración con tinguidura social na que se analicen as condicións familiares, a autonomía e o illamento".