A alcaldesa do Porriño asegura que se fixo un arranxo na vía para incrementar a velocidade
viernes, 9 de septiembre de 2016, 11:47
A alcaldesa da localidade do Porriño (Pontevedra), Eva García, explicou este venres que recentemente se fixo un arranxo na vía para que os convois circulasen a máis velocidade a pesar de que pasa "polo medio do pobo".
Así o explicou, en declaracións aos medios no lugar do accidente ferroviario a alcaldesa, que explicou que acudiu ao lugar tras recibir unha chamada sobre o descarrilamento. "Vinme inmediatamente", asegurou, para explicar que ao chegar "había feridos baixando do tren".
"Confirmáronme tres falecidos", relatou, para apuntar a posibilidade de que algún dos mortos non estivese dentro do tren. Ademais, valorou que "o dispositivo de emerxencia funcionou ben" e eloxiou a axuda veciñal. "A xente do Porriño envorcouse, trouxo mantas e veu a axudar", abundou.
Tras o sinistro, a alcaldesa da localidade transmitiu a súa pésame ás familias dos falecidos, así como aos feridos no sinistro do Tren Celta, que cubría a ruta Vigo-O Porto.
Pola súa banda, o subdelegado do Goberno en Pontevedra, Antonio Coello, confirmou os tres falecidos e puntualizou que non se poden confirmar o número exacto de feridos porque "tratan de cotejar o número de persoas evacuadas co número de pasaxeiros que levaba o tren".
AUTORIDADES
Ata o lugar do sinistro trasladáronse, entre outras autoridades, o vicepresidente da Xunta, Alfonso Rueda; o conselleiro de Sanidade, Jesús Vázquez Almuíña; a presidenta da Deputación de Pontevedra, Carmela Silva; o alcalde de Vigo e presidente da FEMP, Abel Caballero, e as rexedoras do Porriño e Mos, Eva García e Nidia Arévalo.
Está previsto que sobre as 12,00 horas cheguen ao lugar o ministro de Fomento en funcións, Rafael Catalá, e outros cargos do ministerio xunto a el.