Galicia foi a segunda autonomía con maior taxa de feminicidios en 2014
jueves, 13 de octubre de 2016, 21:30
Galicia situouse en 2014 como a segunda comunidade autónoma con maior taxa de feminicidios, 4,72 por cada millón de mulleres maiores de 15 anos, segundo o informe anual sobre vítimas mortais da violencia de xénero e da violencia doméstica no ámbito da parella ou exparella, analizado e aprobado este xoves polo Grupo de Expertos do Observatorio contra a Violencia Doméstica e de Xénero.
Segundo o informe, difundido polo Tribunal Superior de Xustiza de Galicia (TSXG), as comunidades autónomas cunha maior taxa de feminicidios en 2014 foron as Illas Baleares (6,37) seguida de Galicia e, a continuación, Cataluña e Andalucía. En concreto, no caso da comunidade galega houbo seis mulleres falecidas, das que dúas denunciaran.
A nivel estatal, un total de 54 mulleres e catro menores faleceron en España en 2014 como consecuencia de crimes machistas, segundo o citado informe, que remarca que se trata da mesma cifra que o ano anterior. O Observatorio indica que 802 mulleres foron asasinadas en España a mans das súas parellas ou exparellas entre os anos 2002 e 2014.
DATOS DE MENORES E HOMES
Por outra banda, precisa que, como consecuencia das recentes reformas legais que inclúen aos menores como vítimas directas da violencia de xénero, o Observatorio incluíu no informe deste ano o dato dos menores mortos por violencia de xénero no ámbito da parella ou expareja. Así mesmo inclúense no Informe os homes mortos en 2014 por violencia doméstica, que foron 8 en todo o Estado.
No caso das mulleres asasinadas no ano 2014, a idade media foi de 47 anos, o que supón un incremento respecto de anos precedentes. Un 52 por cento das vítimas tiña entre 26 e 45 anos e nun 26 por cento dos casos as mulleres asasinadas contaban con máis de 56 anos. En 2014 descendeu o número de crimes de mulleres con idade inferior a 25 anos.
O 68 por cento das vítimas mortais mantiña a convivencia ou o vínculo afectivo, o que supón un aumento de 10 puntos respecto ao ano 2013. Un 74 por cento das falecidas eran españolas e de entre as mulleres asasinadas de orixe estranxeira o grupo máis numeroso o era de América Latina, seguido polo da Europa do Leste e, en menor medida, polo do Norte de África.