Fontás, feliz e coa "lesión completamente esquecida"
martes, 8 de noviembre de 2016, 17:55
Fontás abraza a Guidetti. //Foto: @AFontas3 twiter
O Celta traballa estes días con dez efectivos menos, que perdeu polas convocatorias das seleccións que esta semana xogan partidos de clasificación para o Mundial 2018 e algún amigable.
Así, Berizzo non conta esta semana con Wass, Guidetti, Radoja, Rubén, Jonny, Roncaglia, Pablo Hernández, Marcelo Díaz nin Orellana. Pione Sisto irá o venres á concentración.
Entre eles os servizos médicos celestes interésanse a diario polo chileno Fabián Orellana, que marchou cunha escordadura leve no nocello e que está adestrando á marxe do grupo.
Quen si está de volta, e feliz, é Andreu Fontás, recuperado da súa lesión. Este martes, ante os medios de comunicación declarouse "contento, porque non teño ningún tipo de molestias e a lesión está completamente esquecida". O central cre que "fisicamente me demostrei a min e ao míster que podo xogar dous partidos seguidos", como fixo fronte ao Ajax e o Valencia.
O xogador di atoparse "moi ben, sobre todo no aspecto físico", que lle preocupaba. Porén, despexou as dúbidas coa súa participación "en dous partidos moi esixentes", o que para el foi "importantísimo".