Os traballadores dos 'call centres', en folga por cuarta vez este ano
sábado, 26 de noviembre de 2016, 12:02
O persoal dos centros de chamadas está chamado a secundar o vindeiro luns, día 28, a cuarta xornada de folga de 24 horas deste ano por "un convenio xusto", tal e como informou a CIG.
De feito, este sindicato apela á "participación masiva" contra "as novas regresións" que a patronal "quere impoñer nas negociacións do convenio estatal". "Pretende precarizar aínda máis as condicións laborais mentres reparte beneficios millonarios", censurou.
O convenio, como advertiu a central nacionalista, é "o alicerce xurídico sobre o que o empresariado edifica a precariedade", polo que ve "fundamental" lograr "un acordo favorable" aos intereses dos traballadores.
De aí, explicou, que se chegue a unha cuarta xornada de folga, despois de que os paros anteriores "non fixesen desistir ao empresariado dos principais desafíos que propón en sucesivas negociacións".
As principais mobilizacións terán lugar o luns en Vigo, ás 11,30 horas desde Unísono ata Bosch; na Coruña, ás 12,00 horas desde Atento; en Ourense, cunha concentración ás 12,00 horas na Praza das Damas; e en Lugo, cun acto similar a partir das 12,00 fronte a Abante BPO.