A Xunta pide á UE máis protección contra a volatilidade dos prezos agrícolas
viernes, 9 de diciembre de 2016, 12:31
O director xeral de Relacións Exteriores e coa UE, Jesús Gamallo, vén de participar en Bruxelas no pleno do Comité Europeo das Rexións, onde reclamou máis protección para os agricultores contra a volatilidade extrema dos prezos.
Segundo explicou a Xunta, durante a sesión debateron e aprobaron 12 ditames, incluído un referente á regulación da volatilidade dos prezos agrícolas que incorporou tres emendas presentadas por Galicia.
En concreto, o documento chama a atención sobre as graves consecuencias do descenso dos prezos agrícolas tanto para os produtores como para a seguridade alimenticia dos países máis pobres, lembrando que os dispositivos de xestión de riscos na Política Agraria Común só representan un 0,4% da súa dotación orzamentaria.
Así, o texto propón medidas para facer máis segura a renda dos agricultores, destacando a importancia de loitar contra as prácticas comerciais desleais na cadea de abastecemento. Ademais, suxire que, nos casos de desequilibrio do mercado, as empresas agrícolas poidan reducir a súa produción antes de ser autorizadas pola Comisión Europea.
Ademais, segundo sinalou a Xunta, as emendas galegas recollidas no texto final destacan o papel das organizacións produtoras e interprofesionais como actores imprescindibles para o bo funcionamento do sector.
XESTIÓN DE PESCA
Por outra banda, outro debate que afecta a Galicia foi o que se orixinou en torno ao ditame sobre o futuro regulamento de medidas técnicas no ámbito da pesca, co que se regularán as artes de pesca permitidas, a composición das capturas ou as zonas e tempadas de veda, entre outros.
O proxecto de ditame, liderado por unha concelleira do municipio inglés de Hastings, inclúe 21 propostas presentadas pola Xunta na Comisión de Recursos Naturais e elaboradas a partir do posicionamento adoptado polo Consello Galego de Pesca no mes de xullo.
A pesar de que na votación final decaeron algunhas destas propostas debido a que a relatora emendou o texto aprobado en comisión, a Xunta destacou que se lograron incorporar importantes matices como que toda nova medida, sexa referente a tallas mínimas, vedas ou tamaños da malla, debe ir acompañada sempre dos correspondentes estudos científicos e avaliacións de impacto social e económico.
O representante galego defendeu, ademais, que as artes empregadas pola frota galega son plenamente sustentables e posúen unha alta selectividade.