Compromiso por Galicia reclama unha cincunscrición electoral para os emigrados
lunes, 12 de diciembre de 2016, 15:41
Compromiso por Galicia (CxG) reclamou que os galegos emigrados poidan participar con garantías nos procesos democráticos para o que pide unha regulación urxente dos seus dereitos e propón a creación dunha circunscrición propia para a Galicia exterior.
Así se pronunciou a formación nun comunicado remitido aos medios este luns e despois de que a Comisión de Peticións do Parlamento Europeo transmitise a súa preocupación polo sistema de voto rogado.
Sobre esta cuestión, Compromiso por Galicia valorou a proposta da Xunta Electoral de implantar o voto telemático para os residentes ausentes, pero tamén a posibilidade de ofrecer un voto en urna accesible.
Con todo, considerou que se debe "ir máis aló" e "falar da representatividade". Para iso, propón que haxa unha circunscrición propia para as eleccións galegas, para que os veciños da diáspora "teñan voz propia" e "representantes da súa contorna no Parlamento de Galicia".
Ademais, tamén demandou que a Galicia exterior teña representantes no Congreso e no Senado, para "poder achegar directamente as súas problemáticas aos foros adecuados". "Hai que buscar solucións de alcance para un problema que se mantén e optar por solucións e non por rendementos puntuais", sinalou.