O CHUS afirma que "non hai atrasos" na hospitalización
jueves, 5 de enero de 2017, 13:53
O Complexo Hospitalario Universitario de Santiago (CHUS) explicou este xoves que "non hai atrasos" na hospitalización, pese ao aumento da afluencia de pacientes en urxencias, xa que o nivel de ocupación do centro "non é elevado".
De feito, o pasado luns día 2 foron atendidos 447 pacientes adultos e 85 pediátricos no servizo de urxencias do CHUS, segundo os datos publicados na súa páxina web, mentres que o mércores 4 a afluencia reduciuse a 357 atencións de adultos e 71 pediátricas.
En canto ao número de ingresos desde o servizo de urxencias, o luns a semana iniciouse con 69, mentres que este mércores as hospitalizacións situáronse en 52.
Neste sentido, fontes do CHUS explicaron a Europa Press que esta semana se iniciou "cun incremento na demanda asistencial de urxencias" no Hospital Clínico respecto da media diaria de asistencias do ano pasado.
O CHUS asegura que "todas as infraestruturas de urxencias están abertas e coa dotación de persoal habitual, máis reforzo en persoal de enfermería no propio servizo de urxencias" e, segundo puntualiza, "facultativos de Medicina Interna para dar apoio tanto aos pacientes que ingresan desde urxencias como aos que están en planta".