O Consello da Cultura Galega organiza este luns unha xornada sobre o patriacado na xustiza

O Consello da Cultura Galega acolle este luns unha xornada destinada a coñecer como funciona o patriarcado na xustiza, un asunto de actualidade que, segundo asegura a entidade nun comunicado, "pódese apreciar en numerosas sentenzas", algunhas "mesmo moi mediáticas en relación cos menores".

Este evento, bautizado 'O patriarcado na xustiza', contará coa presenza de profesionais da psicoloxía e a xustiza, que establecerán novos puntos de vista sobre este ámbito. A xornada poderá seguirse en directo desde a propia páxina web do Consello da Cultura.

O programa aséntase en dúas conferencias e unha mesa redonda para conseguir un diálogo "máis fluído e produtivo", segundo valora a organización.

Da primeira das conferencias encargarase a psicóloga clínica e perita forense experta en violencia de xénero Sonia Vaccaro, co seu relatorio 'A xustiza como instrumento da Violencia Vicaria: a ideoloxía da suposta síndrome de alienación parental e a custodia compartida imposta'.

Seguidamente, a xuíza experta en violencia de xénero Paz Filgueira tratará a problemática existente ao redor do réxime de custodia. Máis concretamente, falará da lei do menor de 1996 e das súas sucesivas reformas. Ambas as relatoras participarán nun coloquio posterior.