O popular Francisco González renuncia como concelleiro de Ourense

Francisco González Bouzán

Nun comunicado, o alcalde, Jesús Vázquez, di que respecta a decisión e destaca a "gran valía, capacidade e enorme impronta humana" de González Bouzán.

Apenas mes e medio despois de tomar posesión do seu cargo, o concelleiro do Goberno municipal de Ourense Francisco González Bouzán vén de presentar a través do Rexistro do Concello a súa renuncia ao cargo de concelleiro, que solicita que se faga efectiva ante o Pleno da Corporación na primeira sesión que se celebre.

O concelleiro de Cultura, Recursos Humanos e Seguridade Cidadá, atópase actualmente de baixa por enfermidade.

O alcalde de Ourense, Jesús Vázquez, lamenta a marcha de Francisco González, un home do que salienta a súa "gran valía, capacidade e enorme impronta humana" que, asegura, "deixou de manifesto neste Concello".

Jesús Vázquez respecta a súa decisión e avanza que Francisco González "sempre terá aquí a súa casa e seguiremos colaborando con el".

O grupo de goberno dará conta no próximo pleno da renuncia e posteriormente procederá á incorporación da seguinte persoa na lista, que sería Flora Moure.

González Buján abandona o seu cargo xusto despois de que se coñecera que Manuel Baltar, o seu xefe na Deputación de Ourense, lle pedira por escrito que reducira as súas responsabilidades como director do Centro Cultural ao considerar que non debía compatibilizar este posto co de concelleiro.