Converfit, unha 'startup' viguesa, seleccionada por Microsoft para participar nun programa de aceleración en Londres
Como un dos oito proxectos máis innovadores e con maior proxección do panorama mundial
A empresa emerxente viguesa Converfit foi seleccionada por Microsoft para participar nun programa internacional de aceleración de empresas en Londres, como un dos oito proxectos máis innovadores e con maior proxección do panorama mundial.
Esta empresa é a responsable dunha aplicación que ofrece ás tendas online (as e-commerce) para coñecer os seus clientes, saber quen está a visitar o seu web, ou se algún cliente necesita axuda, todo en tempo real.
A app está dispoñible para Android e iOS, e proximamente estarao en versión web. Ademais, a través da súa conta de Twitter, recollerá a opinión das e-commerce e publicará as actualizacións.
A participación no programa de aceleración de Microsoft (por 3 meses) supón que a empresa terá un espazo de traballo no centro de Londres, e medio millón de libras en infraestruturas, o que permitirá a Converfit darse a coñecer internacionalmente. De feito, xa recibiu as primeiras propostas de investidores, tanto nacionais como estranxeiros.
Converfit xa foi recoñecida, o pasado mes de xullo por outro xigante tecnolóxico, Google, que a elixiu como unha das startups máis atractivas do panorama B2B español.
Escribe tu comentario