A Plataforma en Defensa do Ensino trata de parar a reválida de 6º de primaria
Piden o auxilio da Valedora do Pobo e anuncian unha folga estudiantil para o día 13 e unha concentración para o día 20
Tralo primeiro paso no Congreso para paralizar a LOMCE, a Plataforma Galega en Defensa do Ensino Público recrudece a súa loita para deter a súa aplicación en Galicia, cos ollos postos na reválida de 6º de primaria prevista para finais de maio.
Este xoves presentou un escrito reclamando que a Valedora do pobo que interceda para paralizar a aplicación da lei en Galicia. Ademais, anuncian unha folga estudantil para o vindeiro 13 de Abril e unha concentración diante da Consellería de Educación para o día 20.
O voceiro da plataforma, Anxo Louzao, pídelle á consellería que paralice a aplicación dunha lei "que ten os días contados", centrándose na inminente reválida que someterá a "un castigo" aos alumnos de 6º de primaria sen aportar "nada á súa educación nin á súa aprendizaxe".
Están convencidos de que paralizar esta proba é o "mellor que se pode facer", sobre todo tendo en conta que segundo denuncian "a día de hoxe aínda non se sabe en que vai consistir". Aseguran que a consellería aínda non lle comunicou aos centros educativos o contido da reválida máis aló da normativa marco e que non habería ningún impedimento para paralizar a súa aplicación.
Aínda así, desconfían de que a consellería cambie a súa actitude, xa que sempre foi "máis papista que o papa", converténdo Galicia na "avanzadilla" dunha aplicación que foi "unha chambonada absoluta". Por iso avanzan que haberá unha folga estudiantil o vindeiro 13 de marzo e unha concentración o día 20 diante da consellería de Educación en Santiago.
Se todo falla, tamén ten previsto boicotear a celebración da reválida, pedíndolle aos pais que non envíen aos nenos aos centros o día das probas. Trátase dunha medida da que xa botaron man o ano pasado no caso da reválida de 3º de primaria e afirman que conseguiron un seguimento de máis do 50%.
Escribe tu comentario