​Chaman á insumisión contra as "reválidas" de primaria

A Plataforma Galega en Defensa do Ensino Público confirmou este mércores que tratará de boicotear as evaluacións de 3º e 6º de primaria previstas pola LOMCE, fixadas para maio esta mesma semana pola Xunta, cunha protesta contra a consellería de Educación que tamén reclamou a paralización da implantación da LOMCE en Galicia e a súa derogación definitiva en Madrid. 

O voceiro da plataforma, Anxo Louzao (Cig-ensino) chama á "insumisión" ás familias nas probas de primaria, pedíndolles que non envíen aos nenos aos centros a realizar ás probas para non sometelos a un "calvario" innecesario. Denuncian que as probas "nada aportan ao proceso de ensino e aprendizaxe" e que en cambio contribúen á imposición dun ensino "clasista e elitista".

Recordan o boicot que xa realizaron hai un ano no caso da evaluación de 3º de primaria, na que segundo eles alcanzaron unha insumisión de máis do 50% dos alumnos nos colexios públicos. Dende a consellería aportan cifras diferentes, considerando que 4 de cada 5 alumnos realizaron as probas. Pero a plataforma considera que estas cifras inclúen os centros privados e concertados, nos que non poden conseguir datos.

En todo caso, confían en poder boicotear as evaluacións deste ano. Fernando Lacaci, presidente da federación de anpas de de compostela, anima deixar aos nenos na casa garantindo que non acarreará ningunha consecuencia. Recoñece que as dificultades de conciliación supoñen unha vantaxe coa que "xoga a consellería", pero aínda así pídelles ás familias que tiren das solucións que atopan en épocas como o verán para evitar someter aos seus fillos ás probas.