Unha circular aconsella ao persoal do CHUS non incitar aos pacientes a reclamar

A Asociación de Pacientes e Usuarios do Complexo Hospitalario Universitario de Santiago (CHUS) acaba de pedir formalmente a retirada dunha circular de 2009 que segundo indican se segue utilizando para fixar as citas dos pacientes, na que se lle indica aos profesionais que non animen aos usuarios a presentar reclamacións.

Trátase do último punto da circular, que aconsella textualmente"non incitar aos pacientes a que reclamen, é un dereito e unha opción persoal de cada cidadán e dende cita previa non se debe promover".

Dende a asociación entenden que esa indicación vulnera o dereito dos pacientes a recibir información, indo ademais en contra das obrigas estatutarias e laborais dos profesionais sobre o proceso asistencial e sobre os servizos dispoñibles.

Consideran que os responsables do centro "procuran evitar que os enfermos exerzan o mínimo dereito a expresar a súa desconformidade cando se exceden amplamente os prazos indicados polos propios especialistas do centro para realizar unha proba ou unha revisión".

Por último, tamén critican pola outro punto da mencionada circular no que se indica que todo paciente que se cite para revisión debe saír do hospital coa cita asignada. Entenden que esta recomendación non se corresponde coa realidade, denunciando que en citas radiolóxicas se lle está dicindo aos pacientes que "será o hospital quen se poña en contacto coa persoa en cuestión para comunicarlle a cita."