​Denuncian un novo retraso de cinco meses na cita dunha paciente oncolóxica do CHUS

Hai pouco máis dunha semana SOS Sanidade pública denunciaba os retrasos de citas de revisión de pacientes oncolóxicos no hospital de Santiago, admitidas e en teoría subsanadas pola xerencia do hospital. Pero dende a Asociación de Pacientes e Usuarios do Chus acaban de destapar un novo caso dun retraso de cinco meses, que segundo eles serve como “terrible exemplo do que é a día de hoxe a situación destes doentes”.

Trátase do caso de María José Ínsua Horta, diagnosticada en 2012 cun cancro de colon con metástase no útero e nos ovarios, que xa requeriu dúas importantes operacións cirúrxicas. Segundo denuncian dende asociación, a finais de decembro de 2015 tivo que reclamar porque se lle adxudicaba unha cita para a unidade de raquis para abril de 2016, conseguindo ser atendida antes de que rematase o ano.

Nesta cita o especialista solicítalle unha resonancia con carácter preferente, ante a sospeita de que exista metástase na columna. A recomendación é que as probas de carácter preferente sexan realizadas en 15 días, pero o certo é que 150 despois a doente “non tivo ninguna noticia nin lle comunicaron cando lla van a practicar”.

Por iso dende a asociación lle esixen ao CHUS que se proceda á “inmediata atención” desta paciente e de todos aqueles en situación similar, que se lle realice unha proba diagnóstica “imprescindible para o seu posterior tratamento, e esencial para súa supervivencia”.