Case toda Galicia, en risco de incendio moi alto ou extremo

Case a totalidade dos municipios galegos atópanse nunha situación de risco de incendio moi alto ou extremo, como é habitual na tempada estival. As excepcións atópanse no norte e o leste da provincia de Lugo, a Costa da Morte e algunha pequena zona do centro e o leste da provincia de Ourense.

Así o reflicte o mapa do Índice de Risco Diario de Incendio (IRDI) forestal, distribuído pola Consellería do Medio Rural e actualizado diariamente. De acordo co plano, establécense cinco situacións de risco de incendio, extremo, moi alto, alto, moderado e baixo --o extremo é o vermello e, o baixo, o azul--.

Para o establecemento do índice de risco diario de incendio tense en conta a conxunción dos seguintes factores: a situación meteorolóxica, o estado da biomasa vexetal, o estado das infraestruturas preventivas das masas arbóreas e o estado do solo.

En concreto, a actualización deste mércores non establece risco baixo en ningún municipio galego, pero si moderado en zonas da Mariña.

EN risco alto están a zona norte da Coruña que limita coa provincia de Lugo e a zona de Malpica, Ponteceso, Cabana e Laxe. O resto de Galicia está en situación de risco moi alto ou extremo.