​Feijóo alimenta as especulacións sobre un adianto ao 25 de setembro

Alberto Núñez Feijóo non fará pública ata esta tarde a súa decisión sobre a data na que se celebrarán as eleccións galegas, segundo confirmou a preguntas dos xornalistas.

Na visita á nova escola pública infantil da Sardiñeira, o titular do Executivo galego non quixo desvelar se finalmente convocará as eleccións autonómicas o 25 de setembro, o que as faría coincidir cos comicios vascos, ou en outubro.

Unicamente, ratificou que o fará público esta tarde, unha vez que fale cos membros do Executivo galego. "Temos que decidir o que cremos que é mellor para Galicia e para esta situación atípica e excepcional que estamos a vivir desde o punto de vista electoral en España", puntualizou.

CONTEXTO POLITICO

"Levamos dúas eleccións xerais consecutivas en sete meses e agora tocan dúas eleccións autonómicas a pouca distancia", remarcou ante a confirmación da data dos comicios vascos.

Por iso, comprometeuse a trasladar "no día de hoxe" aos galegos a súa decisión sobre a convocatoria das eleccións galegas. "O día de hoxe non acaba agora", remarcou cun sorriso o titular do Executivo galego. As eleccións débense celebrar entre 54 e 60 días despois de que se publique a convocatoria; polo tanto, de coincidir coas vascas, o anuncio non se pode atrasar máis.

"Pola tarde temos que facer pública a decisión porque o lóxico é que cando o Goberno ten que tomar unha decisión responda". "Pero temos todo o día de hoxe para adoptar esa decisión", recalcou.

"O meu deber é falar coa xente que teño que falar e, posteriormente, que a Xunta faga pública a decisión", apostilou na mesma liña. Preguntado se convocará a unha reunión esta tarde aos membros do seu Executivo, Feijóo eludiu contestar se o fará. "Déixenme facer as cousas cos protocolos previstos", insistiu.

"TEMPOS ELECTORAIS" DISTINTOS

O conselleiro de Economía e Industria, Francisco Conde, afirmou na mañá deste luns en Lugo, preguntado sobre a convocatoria das eleccións, que o presidente da Xunta "vai dar unha resposta aos intereses xerais de Galicia", á vez que afirmou que "os tempos electorais do País Vasco e de Galicia son distintos".

Conde, que negou que Feijóo informase ao Goberno galego sobre cando ten previsto anunciar as eleccións, interpelado sobre se se desmarcará da convocatoria de Urkullu no País Vasco para o 25 de setembro, dixo que "absolutamente". "Os tempos electorais do País Vasco e Galicia son distintos", abundou.

"O lehendakari Urkullu convocou as eleccións o 25 de setembro, porque entende que era a mellor opción para os intereses xerais de Euskadi e, loxicamente, o presidente Feijóo vai convocar as eleccións en Galicia dando resposta, única e exclusivamente, aos intereses xerais de Galicia e dos galegos. A iso debémonos como goberno", sentenciou..