"O que máis demandan os nenos é pasar tempo cos seus pais"

Gañador na categoría de Primaria: M. S. G. do Colexio Inmaculada Concepción (Zaragoza)

Unha nena xoga co seu boneco mentres imaxina como de feliz sería se puidera gozar de máis tempo coa súa familia. Así é o debuxo gañador na categoría de Educación Primaria que levou o Colexio zaragozano Inmaculada Concepción tras particicpar no VII Concurso Escolar 'Canto tempo tes para min?' convocado pola ARHOE-Comisión Nacional para a Racionalización dos Horarios. Simple pero rebelador, a composición mostra o significado que ten para os nenos o concepto de conciliacion de vida persoal, laboral e familiar. 

Todos os nenos que participaron no VII Concurso Escolar 'Canto tempo tes para min?', no que foron premiados alumnos de Zaragoza e Ourense, coinciden en destacar aquelas actividades que botan en falta por non poder compartir máis tempo cos seus pais, segundo informa a Comisión Nacional para a Racionalización dos Horarios Españois (ARHOE).

En palabras de José Luis Casero, presidente de ARHOE-Comisión Nacional para a Racionalización dos Horarios Españois: "Un ano máis puidemos deducir dos traballos presentados que o que máis demandan os nenos é pasar máis tempo cos seus pais. Laméntanse da ausencia que atopan na casa á hora de enfrontarse ás tarefas diarias, preocupacións e problemas, así como a falta de comunicación, algo que nos preocupa moito e que deberiamos solucionar inmediatamente. Queda moi claro que o mellor regalo que os pais poden facer aos seus fillos é o seu tempo".

O concurso estivo dividido en dúas categorías distintas, por unha banda os nenos de Educación Primaria realizaron un debuxo e os de Educación Secundaria realizaron unha entrevista aos seus proxenitores. En ambas as modalidades debían quedar explicados os conceptos tempo e conciliación e a motivación aos seus pais sobre a importancia que ten dedicar máis tempo aos seus fillos. Así, o gañador de Educación Primaria foi M.S.G. do Colexio Inmaculada Concepción de Zaragoza e os gañadores de Educación Secundaria foron M.A.A. e J.A.A. do Colexio Plurilingüe Divina Pastora de Ourense.

A ARHOE promoveu o VII Concurso Escolar 'Canto tempo tes para min?', que estivo patrocinado polo Grupo Anaya, o Grupo SM e a Fundación Independente e contou coa colaboración do Centro Nacional de Innovación e Investigación Educativa do Ministerio de Educación, o Consello Escolar do Estado, CONCAPA, ANPE e USO.