Os aeroportos galegos captaron case medio millón máis de pasaxeiros
Alvedro superou o millón de viaxeiros e Lavacolla pasou dos dous e medio, pero foi Peinador o que máis notou a suba, un tercio máis que en 2015.
Os tres aeroportos galegos gañaron case medio millón de pasaxeiros no ano 2016 con respecto a 2015 e incrementaron un 8% a cifra de operacións.
Así o reflicten as estatísticas feitas públicas este mércores por Aena, que apuntan que os tres aeródromos galegos rexistraron subidas tanto en cifra de pasaxeiros como de operacións o pasado ano, especialmente relevantes no caso de Vigo.
En conxunto, fixeron uso dos aeroportos da Comunidade 4.528.037 pasaxeiros, o que supón case medio millón máis que durante o ano anterior, un 12% máis.
Así mesmo, estas instalacións operaron 48.469 voos, 3.665 máis que entre xaneiro e decembro de 2015, o que supón un incremento do 8% neste parámetro.
VIGO LIDERA As SUBIDAS
Por aeroportos, o crecemento máis importante foi o de Vigo, que rexistrou durante 2016 case un millón de pasaxeiros, un 33,7% máis que o ano anterior. Destes, 953.248 foron pasaxeiros comerciais, 887.996 en traxectos nacionais (un 31,8% máis) e 65.252 en traxectos internacionais (un 71% máis).
Así mesmo, Peinador operou ao longo do pasado ano 11.557 voos, un 20,6% máis que en 2015, dos que 8224 foron voos comerciais nacionais e 1.144 voos comerciais internacionais. Pola terminal de carga pasaron máis de 476 toneladas de mercadoría, un 11,3% menos.
MÁIS DE 2,5 MILLÓNS EN SANTIAGO
Pola súa banda, o aeroporto de Santiago superou en 2016 os 2,5 millóns de pasaxeiros, concretamente 2.510.740, o que supón un 9,3% máis que o ano anterior. Do total, 1.965.381 realizaron traxectos comerciais nacionais (un 11,3% máis) e 541.413 traxectos comerciais internacionais (un 2,9% máis).
En relación ás operacións, Lavacolla xestionou entre xaneiro e decembro 21.277 voos, un 3,6% máis. Destes, 15.201 foron voos comerciais nacionais e 4.263 voos comerciais internacionais. A terminal de carga manexou 2.296 toneladas de mercadoría, un lixeiro descenso do 0,6% con respecto ao ano anterior.
Finalmente, o aeroporto da Coruña rexistrou o pasado ano 1.063.291 viaxeiros, un 13,7% máis, dos que 933.535 foron de voos comerciais nacionais e 120.088 realizaron traxectos comerciais internacionais.
Ademais, Alvedro operou 15.635 voos, un 6,5% máis, dos cales 8.484 foron comerciais nacionais e 1.445 operacións comerciais internacionais. A terminal de carga coruñesa moveu máis de 184 toneladas de mercadoría, un 31% máis.
DATOS DE DECEMBRO
En canto aos datos do mes de decembro, o aeroporto de Vigo rexistrou un incremento na súa cifra de pasaxeiros do 11,6% con respecto ao último mes de 2015, ata os 63.361 usuarios. Así mesmo, operáronse 831 voos (un 18,2% máis) e transportáronse 38 toneladas de mercadoría (11,2% menos).
En Lavacolla experimentouse no último mes de 2016 un incremento do 6,1% na cifra de pasaxeiros, ata os 174.396; mentres que as operacións alcanzaron as 1.445 (-0,5%) e movéronse 231 toneladas de mercadoría (+0,1%).
Finalmente, 84.223 pasaxeiros elixiron A Coruña durante decembro, un 4% máis que o ano anterior. O aeródromo de Alvedro operou 1.165 voos (un 13,7% máis) e moveu 20 toneladas de mercadoría (un 16% máis).
Escribe tu comentario