Piden unha "fronte política" contra as touradas
domingo, 27 de marzo de 2016, 15:09
A plataforma 'Galicia, Mellor Sen Touradas' considera que estamos no momento axeitado para abordar unha "fronte política" contra as touradas en Galicia.
Pídenlle aos diversos partidos e coalicións políticas que inclúan nos seus programas para as vindeiras eleccións autonómicas o compromiso formal de eliminar as touradas na nosa comunidade.
Nun comunicado, os abolicionistas sinalaron a "necesidade" de que as diferentes mareas municipais, o BNG, Anova, Podemos, Esquerda Unida, Equo, Compromiso por Galicia e PSdeG, "entre outras formacións", asuman a iniciativa de "sumar un parágrafo igual para todos nos seus respectivos apartados de Medio Ambiente e Benestar Animal".
En concreto, o parágrafo sería o seguinte: "Compromiso de impulsar ou apoiar un proxecto lexislativo que suprima as corridas de touros e calquera outro evento taurino na Lei de Protección Animal de Galicia".
Neste sentido, dita plataforma, conformada por máis dunha trintena de colectivos e entidades de todo tipo, subliñou o "escaso apoio cidadán" co que contan as corridas de touros. De feito, como proba diso, indicou que "só en Pontevedra hai garantida unha feira taurina".
"MOMENTO SOCIAL E POLÍTICO ADECUADO"
"É o momento social e político adecuado para expor unha iniciativa parlamentaria, trala convocatoria electoral, que reflicta fielmente a oposición das galegas e galegos a un espectáculo público no que se martiriza, tortura e mata a un animal como suposta forma de cultura", explicaron os abolicionistas.
Outra das "bazas" dos animalistas é "o crecente apoio internacional" que recibe a campaña polo fin das corridas de touros en Galicia.