A categoría de enfermeiro especialista comeza "os seus últimos pasos" para converterse nunha realidade
lunes, 30 de mayo de 2016, 17:07
O conselleiro de Sanidade, Jesús Vázquez Almuíña, asegurou este luns que a creación da categoría de enfemeiro especialista no Sergas xa está comezando “os seus últimos pasos para a súa culminación", converténdose nunha "realidade".
Almuíña defendeu a creación desta nova categoría estatuaria, que segundo destacou foi aprobada con unanimidade das organizacións sindicais presentes na Mesa Sectorial de Sanidade e posibilitará "a incorporación do novo persoal titulado das especialidades de enfermería en condicións de pleno recoñecemento normativo e profesional”.
Sen dar prazos concretos sobre a súa posta en marcha, o conselleiro sí asegurou que se procedería á creación e dotación progresiva de prazas, en función das necesidades reais da organización.
Almuíña fixo estas declaracións no acto de clausura da II Xornada de Residentes de Enfermería Familiar e Comunitaria de Galicia, onde tamén falou da importancia dos profesionais de enfermería comunitaria, que segundo destacou representa o grupo profesional máis cercano á poboación e, en moitas ocasións, o máis accesible e dispoñible para a cidadanía.