"Non poden cambiar o noso modo de vida"
viernes, 15 de julio de 2016, 14:06
Por iso, apuntou que se continuará co "dispositivo especial de protección" programado, que se sumará ao xa despregado durante todo o verán e que se desenvolverá en dúas partes, unha os días 22 e 23 e outra, "máis intensa", o 24 e 25. Eses días "vai haber gran presenza policial para que a festa se desenvolva con tranquilidade", dixo Villanueva.
Na ampliación do dispositivo participará non só a comisaría de Santiago, senón que se "reforzará con efectivos doutras comisarías, unidades de intervención, guías caninos, TEDAX e incluso medios aéreos".
En xeral, a vixilancia policial será especial nas zonas de "concentración de persoas", así como en aeroportos, portos ou estacións de autobús. Villanueva agradeceu o traballo dos corpos de seguridade e pediu "mandar a mensaxe" de que "non poden cambiar o noso modo de vida".
UN LUGAR SEGURO
Na mesma liña, o alcalde de Santiago, Martiño Noriega, mostrouse convencido de que Santiago é un emprazamento "simbólico" que constitúe un "lugar seguro para gozar" das celebracións.
A preguntas dos medios, Noriega lembrou que o nivel de alerta terrorista non aumentou en España, polo que "non hai nada que xustifique" que o dispositivo de seguridade do Apóstolo "varíe". Noriega expresou a súa "confianza" nos corpos e forzas de seguridade do Estado e animou a "habitar espazos lonxe do efecto" que "pretenden" provocar atentados como o de Niza, que "se asentan na sen razón".